63 yoshli amerikalik aktyor va kinorejissyor Jorj Kluni o‘zi bilan shaxsiy uchrashuvni kimoshdi savdosiga qo‘ydi. Bu haqda People Talk xabar bermoqda. Katta pul evaziga yulduz bilan kechki ovqatga borish va qiziqtirgan savollarni berish mumkin.
Auksionga qo‘yilgan lot narxi 10 000 dollardan boshlangan edi. Hozirda uning miqdori uch barobarga oshgan, deb yozadi Daily Mail. Uchrashuv 24-sentyabr kuni Nyu Yorkda bo‘lib o‘tishi rejalashtirilgan.
“Sizlarni janob Kluni bilan kechki ovqatga taklif etamiz. Yulduz bilan esdalik uchun suratga tushish, uchrashuvdan zavq olish hamda mashhurga o‘zingizni qiziqtirgan savollaringizni berishingiz mumkin”, deyiladi auksion saytida.
Kimoshdi savdosi 20-avgustga qadar davom etadi, hozirda lotning narxi allaqachon 31 ming dollargacha ko‘tarilgan. Yig‘ilgan mablag‘ “Adolat uchun Kluni fondi” nomli inson huquqlarini himoya qilishga qaratilgan jamg‘arma tashkilotiga yo‘naltiriladi.
Gollivud aktyori ko‘plab filmlarda suratga tushgan, ulardan aynan “Mukammal bo‘ron”, “Tundan tonggacha” va “Oushenning 11 do‘sti” kabi filmlar katta mashhurlik keltirgan.
Izoh (0)