Ukraina armiyasi tomonidan Kursk viloyatida asirga olinganlarni almashish bo‘yicha Rossiya va Ukraina o‘rtasida muzokaralar boshlandi. Bu haqda Financial Times xabar berdi.
Ukraina Oliy Radasining Inson huquqlari bo‘yicha komissari Dmitriy Lubinets bir kun avval Rossiya mahbuslarni almashish masalasini muhokama qilishni boshlaganini va u rossiyalik hamkasbi Tatyana Moskalkova bilan gaplashganini aytgan.
“Bu qanday yakunlanishini hali bilmaymiz, ammo Ukraina tomoni har doim almashinuv jarayonlarini amalga oshirishga tayyor”, deydi u.
Ukraina prezidenti Vladimir Zelenskiy 13-avgust kuni “yuzlab rossiyalik harbiylar” taslim bo‘lganini ma’lum qilgan. The Independent ismini oshkor etmagan ukrainalik polkovnikka tayanib, Ukraina qurolli kuchlari ikki minggacha rossiyalik askarni asirga olgani haqida xabar bergan.
14-avgust kuni Ukraina armiyasi bosh qo‘mondoni Aleksandr Sirskiy kun boshidan beri ukrainalik harbiylar 100 dan ortiq rossiyalik askarni asirga olganini ma’lum qilgan. “Ukrainskaya Pravda” nashri Ukraina xavfsizlik xizmatidagi manbaga tayanib, 14-avgust kuni 102 nafar rus askari asirga olingani va bu bir vaqtning o‘zida “dushmanning eng ommaviy qo‘lga olinishi” bo‘lganini aytgan.
Lubinetsning taʼkidlashicha, Ukraina tomoni Jeneva konvensiyasiga muvofiq rossiyalik harbiy asirlarning huquqlarini taʼminlaydi.
Rossiya tomonidan qancha ukrainalik askar asirga olingani hozircha noma’lum. 14-avgust kuni Rossiya Mudofaa vazirligi bir kunda 18 nafar ukrainalik harbiy asirga olingani haqida xabar bergan.
Ukraina va Rossiya o‘rtasida “95 ga 95” formulasi bo‘yicha avvalgi mahbuslar almashinuvi joriy yilning 17-yul kuni bo‘lib o‘tgan edi.
Izoh (0)