Фарғона вилояти ҳокими Хайрулло Бозоров Хитойнинг Ding Li group, Shandong develop new material, Zhejiang Yizhou Machinery Technology, Teeyer компаниялари вакиллари билан учрашув ўтказди. Бу ҳақда вилоят ҳокимлиги матбуот хизмати хабар берди.
Маълум қилинишича, мулоқотда Фарғонадаги кичик саноат зоналари ва “Қўқон” ЭИЗ, шунингдек, эркин иқтисодий зонада хорижий инвесторлар учун яратилган шароитлар ҳамда қонунчилик билан белгиланган имтиёзлар хусусида сўз борган.
Хитойнинг машинасозлик соҳасида илғор компанияларидан бири бўлган Zhejiang Yizhou Machinery Technology компанияси раҳбари Жан Лихю, Фарғонада МДҲ давлатлари ҳамда араб мамлакатларига чиқиш учун қулай имконият мавжудлигидан келиб чиққан ҳолда вилоят ҳудудида қурилиш саноати учун ускуналар ишлаб чиқаришни режалаштираётганини маълум қилди.
Хитойда газобетон блоклар ишлаб чиқариш саноатида 50 фоизга яқин улушга эга бўлган Тееyеr компанияси вакиллари эса дастлабки ҳисоб-китобларга кўра 15 млн доллар атрофида инвестиция йўналтирган ҳолда ушбу қурилиш блокларини Фарғонада ишлаб чиқариш режаларини баён қилди.
Учрашувда, шунингдек, вилоятда ташкил этилиши устида иш олиб борилаётган Хитой технопарки ҳудудига хитойлик тадбиркорларнинг лойиҳаларини жойлаштириш борасида ҳамкорлик юзасидан ҳам ўзаро фикр алмашилди.
Изоҳ (0)