Hindistonda 30-iyul kuni yuz bergan ko‘chkilar oqibatida 100 dan ortiq odam halok bo‘lgan. Bu haqda mamlakat mahalliy manbalariga tayanib, Reuters nashri xabar berdi.
Manbada aytilishicha, Kerala shtati hududida meʼyordan ortiq yog‘ingarchilik ro‘y berishi oqibatida ko‘chkilar yuzaga kelgan. Tabiiy ofat tufayli mamlakatning qator yirik magistrallari to‘silib qolgan, transport harakati to‘xtagan.
Ko‘chki oqibatida Kerala shtatidagi ko‘plab qishloqlar tuproq ostida qolgan. Tog‘ jinslari yomg‘ir taʼsirida ajralib, aholi hududiga qulagan.
Hindistonning eng mashhur sayyohlik maskanlaridan biri sifatida tanilgan Kerala shtatining Vayanad tumanida vaziyat o‘ta ayanchli tus olgani xabar berilgan. Yarim tunda, aholi o‘z uylarida uxlab yotgan bir paytda tuproq uyumi qishloqlarni ko‘mib yuborgan.
Ko‘chkilar oqibatida hozirga qadar kamida 106 kishi halok bo‘lgani tasdiqlangan. Hodisada 128 kishi jarohatlangan. Shtat rasmiylari o‘nlab fuqarolar bedarak yo‘qolganini xabar qilgan.
Seshanba kuni yuz bergan ko‘chkilar 2018-yildan beri sodir bo‘lgan eng halokatli tabiiy ofat hisoblanadi. O‘sha yili sodir bo‘lgan ulkan toshqinda Kerala shtatining 400 ming aholisi halok bo‘lgan edi.
Rasmiylar Keraladagi halokat hududidan 3000 kishi evakuatsiya qilinganini aytgan. Ko‘chirilganlar 45 ta yordam lagerlariga joylashtirilgan. Mamlakat armiyasi dronlar va itlar yordamida yo‘qolganlarni qidirayotgani maʼlum qilingan.
“Tuproq ostida qolib ketgan odamlar juda ko‘p. Suvda oqib ketganlar ham bor. Qutqaruv operatsiyasi butun kuch va vositalar bilan davom etadi” — degan holatga munosabat bildirgan Kerala maʼmuriyati rasmiysi Pinarayi Vijayan jurnalistlarga bergan intervyusida.
Izoh (0)