Efiopiyada 22-iyul kuni yuz bergan ko‘chki oqibatida halok bo‘lganlar soni 229 nafarga yetdi. Bu haqda Reuters nashri xabar berdi.
Manbada aytilishicha, mamlakat janubidagi halokat hududida keng qamrovli qutqaruv operatsiyasi tashkil etilgan. Tadbir davomida omon qolganlar topilmagan bo‘lsa-da, ko‘chki ostidan juda ko‘plab jasadlar olib chiqilgan.
Ko‘chki katta hududni qoplagani bois operatsiya hali uzoq davom etishi mumkinligi aytilgan. Mahalliy politsiya rasmiylari jasadlar soni yana ortishi mumkinligini aytgan.
Halokat yuz bergan Efiopiya janubiy shtatida noqulay ob-havo sharoiti tufayli favqulodda holat eʼlon qilingan. Kuchli yog‘ingarchilik ortidan toshqinlar hamda ko‘chki yuzaga kelishi ehtimoli sabab aholidan chekka hududlarga bormaslik so‘ralgan.
“Biz hali ham qaziyapmiz. O‘liklar chiqishdan to‘xtamayapti. Loy ostida yana qancha odam qolib ketganini bilmaymiz. Bu yerda hali ko‘p ishlaymiz”, degan Efiopiya tabiiy ofatlarga qarshi kurash milliy agentligi rahbari Markos Melese holat yuzasidan bergan intervyusida.
- Maʼlumot o‘rnida, joriy yilning 22-iyul kuniga o‘tar kechasi Efiopiya janubidagi Gofa shahri yaqinida halokatli yer ko‘chkisi sodir bo‘lgan edi.
- Kuchli yomg‘ir oqibatida og‘irlashgan tog‘ jinslari siljib, aholi punktini ko‘mib tashlagan.
- Dastlabki berilgan maʼlumotlarda 50 kishi halok bo‘lgani aytilgan edi.
- Keyinchalik esa qurbonlar soni 200 dan oshgani maʼlum qilingan.
Izoh (0)