Ҳиндистонда 30 июль куни юз берган кўчкилар оқибатида 100 дан ортиқ одам ҳалок бўлган. Бу ҳақда мамлакат маҳаллий манбаларига таяниб, Reuters нашри хабар берди.
Манбада айтилишича, Керала штати ҳудудида меъёрдан ортиқ ёғингарчилик рўй бериши оқибатида кўчкилар юзага келган. Табиий офат туфайли мамлакатнинг қатор йирик магистраллари тўсилиб қолган, транспорт ҳаракати тўхтаган.
Кўчки оқибатида Керала штатидаги кўплаб қишлоқлар тупроқ остида қолган. Тоғ жинслари ёмғир таъсирида ажралиб, аҳоли ҳудудига қулаган.
Ҳиндистоннинг энг машҳур сайёҳлик масканларидан бири сифатида танилган Керала штатининг Ваянад туманида вазият ўта аянчли тус олгани хабар берилган. Ярим тунда, аҳоли ўз уйларида ухлаб ётган бир пайтда тупроқ уюми қишлоқларни кўмиб юборган.
Кўчкилар оқибатида ҳозирга қадар камида 106 киши ҳалок бўлгани тасдиқланган. Ҳодисада 128 киши жароҳатланган. Штат расмийлари ўнлаб фуқаролар бедарак йўқолганини хабар қилган.
Сешанба куни юз берган кўчкилар 2018 йилдан бери содир бўлган энг ҳалокатли табиий офат ҳисобланади. Ўша йили содир бўлган улкан тошқинда Керала штатининг 400 минг аҳолиси ҳалок бўлган эди.
Расмийлар Кераладаги ҳалокат ҳудудидан 3000 киши эвакуация қилинганини айтган. Кўчирилганлар 45 та ёрдам лагерларига жойлаштирилган. Мамлакат армияси дронлар ва итлар ёрдамида йўқолганларни қидираётгани маълум қилинган.
“Тупроқ остида қолиб кетган одамлар жуда кўп. Сувда оқиб кетганлар ҳам бор. Қутқарув операцияси бутун куч ва воситалар билан давом этади” — деган ҳолатга муносабат билдирган Керала маъмурияти расмийси Пинарайи Вижаян журналистларга берган интервьюсида.
Изоҳ (0)