Parij shahrida o‘tayotgan Olimpiya o‘yinlarining ochilish marosimi videosi YouTube tarmog‘idan o‘chirib tashlandi. Bu haqda SOTT manbasi xabar berdi.
Manbada aytilishicha, aholi orasida ochilish marosimi tadbiridagi chiqishlarga nisbatan norozilik kayfiyati kuchayib ketgach, marosim videosi YouTube’dan o‘chirilgan. Butun Olimpiya o‘yinlari tarixida bu kabi holat oldin ro‘y bermagan.
Video nima uchun va kim tomonidan olib tashlanganiga aniqlik kiritilmagan. Xalqaro Olimpiya qo‘mitasi hozircha izoh berishga tayyor emasligini bildirgan.
Ochilish tadbirida namoyish etilgan spektakllardan biri Leonardo Da Vinchining “Maxfiy kecha” surati asosida shakllantirilgan. Unda Iso Masih xochga tortilishidan oldin shogirdlari bilan bir davrada o‘tirgani tasvirlangan.
Ochilish marosimini kuzatgan aholining katta qismi unda xristian anʼanalari buzilgani va Iso Masih shaxsiga nisbatan haqoratga yo‘l qo‘yilganini aytgan. Bu mezbon Fransiya uchun sharmandali holat ekani bildirilgan.
Ochilish tadbirida, shuningdek, Iso va uning shogirdlari qatorida qadimgi yunon xudosi Dionis ham tasvirlangan. Turli dinlarning qorishmasi va eʼtiqodga nisbatan tahqirona munosabat ijtimoiy tarmoqlarda Olimpiya o‘yinlari tashkilotchilariga nisbatan tanqidlarni kuchaytirgan.
Fransiya yepiskoplari ochilish tadbirlarini achinarli deya baholagan. Bunday holat fransuz xristian cherkovi shaʼnini oyoqosti qilishi aytilgan.
“Bu marosim, afsuski, nasroniylikni masxara qilish va tahqirlash sahnalarini o‘z ichiga oladi, biz bundan chuqur taassufdamiz”, deyilgan Parijdagi katolik maʼmuriyati bayonotida.
Izoh (0)