Tojikiston huquq-tartibot idoralari 2024-yilning birinchi yarmida noqonuniy muomaladan 3 tonnadan ortiq giyohvand moddalarni musodara qildi, bu o‘tgan yilning shu davriga nisbatan 25 foizga ko‘pdir.
Respublikadagi giyohvand moddalarning asosiy qismi qo‘shni Afg‘onistondan keladi va u bilan chegaradosh hududlarda olib qo‘yiladi, dedi Tojikiston prezidenti huzuridagi Narkotik moddalarni nazorat qilish agentligi direktori Zafar Samad.
“Tahlillar shuni ko‘rsatadiki, 2024-yilning birinchi yarmida respublikada noqonuniy muomaladan 3 tonna 96 kilogramm 616 gramm giyohvandlik vositalari musodara qilingan bo‘lib, bu 2023-yilning shu davriga nisbatan 25 foizga yoki 619 kilogrammga ko‘p.
“Musodara qilingan moddalarning asosiy qismi Xatlon viloyatida qo‘lga olingan. 2024-yilning birinchi olti oyida Xatlon viloyatida 1 tonna 381 kilogramm narkotik moddalar musodara qilindi. Bu mamlakat bo‘yicha musodara qilingan umumiy miqdorning 44,6 foizini tashkil qiladi”, dedi Zafar Samad.
Shuningdek, u Tojikistonning o‘zida “giyohvand moddalarni ishlab chiqaradigan laboratoriyalar yo‘q, ular boshqa davlatlardan, xususan, Afg‘onistondan olib kelinadi”, deb taʼkidladi.
BMT statistik ma’lumotlariga ko‘ra, 2021-yilda Afg‘onistonda “Tolibon” harakati tarafdorlari hokimiyat tepasiga kelguniga qadar mamlakatda 6 ming tonnadan ortiq giyohvand moddalar tayyorlangan. O‘sha yili giyohvand moddalardan tushgan daromad yalpi ichki mahsulotning 7 foizini yoki 1,8-2,7 milliard dollarni tashkil etgani taxmin qilingan edi. 2022-yilda “Tolibon” ko‘knori yetishtirishni taqiqlab qo‘ydi.
BMTning Narkotiklar va jinoyatchilik bo‘yicha boshqarmasi ma’lum qilishicha, 2023-yilda ko‘knorini yetishtirish va qayta ishlash 95 foizga kamaygan.
Narkotik moddalarni nazorat qilish agentligi direktori may oyida BMTning Giyohvand moddalar bo‘yicha komissiyasining Vena shahrida bo‘lib o‘tgan 67-sessiyasida Afg‘onistonda ham metamfetamin kabi sintetik preparatlar ishlab chiqarish laboratoriyalari yaratilayotganini maʼlum qilgan edi. Uning fikricha, bu butun Markaziy Osiyo uchun tahdiddir.
Izoh (0)