Тожикистон ҳуқуқ-тартибот идоралари 2024 йилнинг биринчи ярмида ноқонуний муомаладан 3 тоннадан ортиқ гиёҳванд моддаларни мусодара қилди, бу ўтган йилнинг шу даврига нисбатан 25 фоизга кўпдир.
Республикадаги гиёҳванд моддаларнинг асосий қисми қўшни Афғонистондан келади ва у билан чегарадош ҳудудларда олиб қўйилади, деди Тожикистон президенти ҳузуридаги Наркотик моддаларни назорат қилиш агентлиги директори Зафар Самад.
“Таҳлиллар шуни кўрсатадики, 2024 йилнинг биринчи ярмида республикада ноқонуний муомаладан 3 тонна 96 килограмм 616 грамм гиёҳвандлик воситалари мусодара қилинган бўлиб, бу 2023 йилнинг шу даврига нисбатан 25 фоизга ёки 619 килограммга кўп.
“Мусодара қилинган моддаларнинг асосий қисми Хатлон вилоятида қўлга олинган. 2024 йилнинг биринчи олти ойида Хатлон вилоятида 1 тонна 381 килограмм наркотик моддалар мусодара қилинди. Бу мамлакат бўйича мусодара қилинган умумий миқдорнинг 44,6 фоизини ташкил қилади”, деди Зафар Самад.
Шунингдек, у Тожикистоннинг ўзида “гиёҳванд моддаларни ишлаб чиқарадиган лабораториялар йўқ, улар бошқа давлатлардан, хусусан, Афғонистондан олиб келинади”, деб таъкидлади.
БМТ статистик маълумотларига кўра, 2021 йилда Афғонистонда “Толибон” ҳаракати тарафдорлари ҳокимият тепасига келгунига қадар мамлакатда 6 минг тоннадан ортиқ гиёҳванд моддалар тайёрланган. Ўша йили гиёҳванд моддалардан тушган даромад ялпи ички маҳсулотнинг 7 фоизини ёки 1,8-2,7 миллиард долларни ташкил этгани тахмин қилинган эди. 2022 йилда “Толибон” кўкнори етиштиришни тақиқлаб қўйди.
БМТнинг Наркотиклар ва жиноятчилик бўйича бошқармаси маълум қилишича, 2023 йилда кўкнорини етиштириш ва қайта ишлаш 95 фоизга камайган.
Наркотик моддаларни назорат қилиш агентлиги директори май ойида БМТнинг Гиёҳванд моддалар бўйича комиссиясининг Вена шаҳрида бўлиб ўтган 67-сессиясида Афғонистонда ҳам метамфетамин каби синтетик препаратлар ишлаб чиқариш лабораториялари яратилаётганини маълум қилган эди. Унинг фикрича, бу бутун Марказий Осиё учун таҳдиддир.
Изоҳ (0)