Isroil delegatsiyasi G‘azoda o‘t ochishni to‘xtatish va garovga olinganlarni almashish bo‘yicha muzokaralarda qatnashmadi, deya axborot manbalariga tayanib Politico xabar berdi.
G‘azodagi urushni tugatish bo‘yicha muzokaralarda ishtirok etgan Isroil delegatsiyasi shu hafta kechki bosqichdagi muzokaralarda qatnashmaslikka qaror qildi. Bundan tomonlar kelishuvga yaqin, deb hisoblagan AQSH rasmiylarining hafsalasi pir bo‘ldi, deyiladi xabarda.
Isroil rasmiylari bu borada hech qanday izoh bermagan. Prezident Jo Bayden ma’muriyati Tel-Avivning qarorini muzokaralar jarayoni uchun muvaffaqiyatsiz deb hisoblamasa-da, ko‘plab amerikalik rasmiylar bu qarordan hafsalasi pir bo‘lgan.
Avvalroq Isroil va Falastinning HAMAS harakati vositachilar orqali garovga olinganlarni ozod qilish evaziga G‘azoda o‘t ochishni to‘xtatish bo‘yicha muzokaralarni qayta boshlagan edi. Bayden Isroil nomidan mojaroni hal qilish bo‘yicha yangi rejani ilgari surganidan beri muzokaralar jarayoni bir oydan ko‘proq vaqt davomida to‘xtab qolgan.
Izoh (0)