Иқтисодий зонага трансформатор, “Замонавий касблар”га ажратилган миллионлар, бир йилдан буён Навоийга етиб бормаган йўлтанламас — Сенат ҳудудлардаги ўрганишлар натижаларини эълон қилди

Олий Мажлис Сенати аъзолари томонидан ўтказилган ўрганишлар чоғида аниқланган камчиликлар ва йиллар давомида пайсалга солиб келинаётган масалалар юзасидан маълумотлар тақдим этди.

Жумладан, “Жиззах” махсус иқтисодий зонасида ҳар бирининг қуввати 40 МВт бўлган икки трансформаторли подстанция, шунингдек, канализация тармоғи қурилиш ишлари пайсалга солиб келинаётгани аниқланган. Шундан сўнг ҳукуматнинг фармойиши қабул қилиниб, унда “Жиззах” МИЗ ҳудудида 40 мВт 2 та трансформаторли подстанция, шунингдек, 1 та оқова сув насос станцияси, 5 км ташқи босимли ҳамда 2,4 км ички оқова сув тармоғи қурилиши белгиланган.

Яна бир ҳолатда Қашқадарё вилоятидаги Шаҳрисабз туманидаги “Баркамол авлод” болалар мактабида “Замонавий касблар” лабораториясини ташкил этиш, фтизиатрия ва пулмонология тизимидаги сиҳатгоҳларни замонавий реабилитация, даволаш ва лаборатория ускуналари билан жиҳозлаш зарур эканлиги аниқланган. Муаммони бартараф этиш учун вилоят ҳокимлиги 181 миллион сўм ажратган.

Бир йил аввал Навоий вилоятдаги туман (шаҳар) тиббиёт бирлашмаларининг кардиология бўлимларига 11 та ЭКГ, 11 та ЭхоКГ, 11 та Холтер-монитор, 11 та дефибриллятор аппаратлари етказиб бериш белгиланган. Шунингдек, тез тиббий ёрдам тизими учун 2 та йўлтанламас автотранспортни етказиб бериш кўзда тутилган. Лекин ҳалигача бу ишлар бажарилмаган.

Сенат ахборот хизматининг “Дарё”га маълум қилишича, ушбу масала назоратга олинган бўлиб, ҳолат юзасидан қўшимча ахборот берилади.