Afg‘oniston janubida “Al-Qoida” terrorchi tashkilotiga aloqador jangarilar to‘planmoqda. Bu haqda BMT Xavfsizlik kengashi matbuot xizmati bayonotiga asoslanib, Atlas Press nashri xabar berdi.
Manbada aytilishicha, BMT Xavfsizlik kengashining sanksiyalar monitoringi guruhi Afg‘oniston janubiy viloyatlari haqida razvedka maʼlumotlari to‘plagan. Unga ko‘ra, mamlakatning Pokiston bilan chegarasi yaqinida 200 dan 400 nafargacha “Al-Qoida” aʼzolari jamlangan.
“Tolibon” nazoratidagi Afg‘onistonda xorijlik jangarilar borligi haqidagi monitoring guruhi xulosasi Xavfsizlik kengashiga iyun oyi oxirida jo‘natilgan. Kengash bu maʼlumotni bir necha bor qayta tekshirgan.
Xabarda aytilishicha, “Al-Qoida” jangarilari hozirda Afg‘onistonnng G‘azni, Hilmand, Qandahor, Nimroz, Paktika va Zobul viloyatlarida mavjud. “Tolibon” ular bilan aloqalarga ega va mamlakatda erkin harakatlanishga ruxsat bergan. Jangarilarning ko‘pchiligi Afg‘oniston, Pokiston, Bangladesh, Hindiston va Myanma fuqarolari hisoblanadi.
“Al-Qoida”ning Hindiston yarimorolidagi yetakchisi Mahmud va uning o‘rinbosari Atif Yahyo G‘oriy ham Afg‘onistonda ekani xabar berilgan. “Tolibon” hukumati bu maʼlumotni oldinroq oshkora rad etgan edi.
Hisobotda xalqaro terrorchi guruhlar Afg‘onistonda keng faoliyat olib borayotganiga urg‘u berilgan. Shuningdek, “Tolibon” mamlakat nazoratini qayta qo‘lga kiritgach, xorijiy ektremistik va terroristik otryadlar uchun “xavfsiz muhit” yaratib bergani taʼkidlangan.
ISHIDning Xuroson bo‘limi rahbari ham Pokistondan Afg‘onistonga ko‘chgan. Bu guruh kichik hududni nazorat qilayotgan bo‘lsa-da, mintaqa bo‘ylab murakkab hujumlarni amalga oshirishi mumkinligidan ogohlantirilgan.
BMT Xavfsizlik kengashi hisobotida “Tahriki Tolibon” va “Sharqiy Turkiston harakati” guruhlari haqida ham xavotirli statistika beriladi. Bu ikki guruh 3000 dan 5000 nafargacha askarga ega ekanligi, ularga xorijdan qurol kelayotgani, guruh rahbarlari Kobulda “Tolibon” bilan mustahkam aloqalar o‘rnatgani xabar qilingan.
“Sharqiy Turkiston harakati” jangarilari hozirda “Tolibon” tomonidan Bag‘lon va Taxor viloyatlariga ko‘chirilgan. Guruh oldin Badaxshonda faoliyat yuritgan. Viloyat hududida uning ming nafardan ortiq askari bo‘lgan. Bu guruh Badaxshonga chegaradosh Tojikistonda jiddiy xavotir uyg‘otgan edi.
Izoh (0)