Peruda arxeologlar 4 ming yillik ibodatxona hamda teatr qoldiqlarini aniqlashga muvaffaq bo‘lishdi. Bu haqda CNN nashri xabar berdi.
Yangi topilgan obyekt dunyoga mashhur Machu-Pikchu obidasidan 3500 yilga qadimiyroq. Shu bilan birgalikda ibodatxona topilishi ibtidoiy davrlardagi Janubiy Amerika xalqlari haqida jangi farazlarni keltirib chiqaradi.
Topilmalarning o‘ziga xos tomoni shundaki, u mintaqadagi qadimiy dinlar va ularning kelib chiqishi haqida maʼlumot beradi. Nisbatan kam o‘rganilgan And platosi haqida yangi talqinlar paydo bo‘lishiga olib keladi.
Arxeologlar jamoasi iyun oyida La Otra Banda, Serro Las Animas manzilgohlarida qazishma ishlarini boshlagan. Mahalliy kamyob topilmalar asosida tarixiy obyektlarni topishga kirishilgan.
Tadqiqot hududida uzunligi taxminan 33 fut va kengligi 30 fut bo‘lgan o‘ra qazilgan. Qazish davomida 6 fut chuqurlikdan qadimiy inshoot devorlari topilgan.
“Bu qadimiy tuzilmalarning yer yuzasiga shunchalik yaqin bo‘lgani hayratlanarli edi”, — degan arxeologlar jamoasini boshqargan muzey tadqiqotchisi Luis Muro Inonyan.
Eng qiziqarli topilmalardan biri sahnaga o‘xshash platformaga olib boradigan, zinapoyali “kichik teatr” bo‘lgan.
Teatr zinapoyalaridan biri mifologik qushga o‘xshash jonzotning o‘ymakor tasviri va loydan yasalgan panellar bilan qoplangan. Shakl miloddan avvalgi 2-mingyillikka aloqadorligi taxmin qilingan.
“Biz And tog‘larida qanday sharoitda murakkab eʼtiqod tizimlari paydo bo‘lganligi haqida hali juda kam maʼlumotga egamiz va hozir bizda dunyoning bu qismida odamlar yaratgan eng qadimgi diniy maskanlar haqida dalillar mavjud”, — deyiladi arxeologlar jamoasi bayonotida.
- Maʼlumot o‘rnida, hozirga qadar Markaziy And tizmasidagi Machu-Pikchu yodgorligi eng qadimiy madaniyat o‘choqlaridan biri sifatida ommaga maʼlum.
- Yodgorlik bundan 3500 yil oldin Inka imperiyasi tomonidan asos solingan. So‘nggi topilma Machu-Pikchudan qadimiyroq bo‘lgan madaniy meros obyektini dunyoga tanishtirdi.
Izoh (0)