O‘zbekiston Olimpiya terma jamoasi hamda Olmaliqning “OKMK” klubi a’zosi Nodirbek Abdurazzoqov faoliyatini Rossiya Premyer Ligasidagi jamoalardan birida davom ettirishi mumkin. Bu haqda rossiyalik insayder Ivan Karpov xabar berdi.
Manbaga ko‘ra, ayni paytda RPLda birorta ham o‘zbekistonlik futbolchi yo‘q, biroq bu holat tez orada o‘zgarishi mumkin. Karpovning ta’kidlashicha, Abdurazzoqovning Rossiya chempionatiga o‘tish ehtimoli yuqori baholanmoqda.
Bundan tashqari, Moskvaning “SSKA” klubi ham o‘zbekistonlik iqtidorli futbolchi — “Olimpik-Mobiuz” a’zosi Rustam Fominga qiziqish bildirgan. Ma’lumotlarga ko‘ra, Fomin o‘tgan yili “armiyachilar” yig‘inida ishtirok etgan. Endi esa “SSKA” bu transferni amalga oshirish ustida ishlamoqda.
Ma’lumot uchun, 2004-yilda tug‘ilgan Nodirbek Abdurazzoqov 2021-yildan beri “OKMK”ning asosiy tarkibida to‘p surmoqda. 2023-yilda u qisqa muddatga Yaypaning “Turon” klubiga ijaraga berilgan. Joriy mavsum futbolchi O‘zbekiston Superligasida 15 ta uchrashuvda maydonga tushib, 3 ta gol va 1 ta golli uzatmaga mualliflik qilgan. Uning “konchilar” bilan amaldagi shartnomasi 2027-yil yakunigacha mo‘ljallangan. Transfermarkt portali Abdurazzoqovning transfer qiymatini 500 ming yevroga baholagan.
Izoh (0)