Xitoy poytaxti Pekin va unga tutash hududlarda yog‘gan kuchli yomg‘irlar va toshqinlar 30 dan ortiq odamning umriga zomin bo‘ldi. 80 ming aholi xavfsiz joylarga evakuatsiya qilindi. Bu haqda Xitoy mahalliy nashrlariga tayanib The Guardian xabar berdi.
Ma’lum qilinishicha, 29-iyul kuni tungi soat 00:00 ga kelib Pekinning Miyun provinsiyasida 28, Yanchin provinsiyasida 2 kishi halok bo‘lgan. Xebey provinsiyasida esa ko‘chkilar tufayli 4 kishi qurbon bo‘lib, 8 nafari bedarak yo‘qolgan.
Xitoyda dam olish kunlaridan boshlab yomg‘ir kuchayib, ayniqsa, 28-iyul kuni Pekin va atrofidagi hududlarda 543 millimetrgacha yog‘ingarchilik kuzatildi. Bu vaqt ichida 80 mingdan ortiq odam xavfsiz joylarga evakuatsiya qilindi. 136 ta qishloq elektr ta’minotisiz qolgani aytilmoqda.
Pekin rahbariyati yomg‘ir va suv toshqinlari yuzasidan eng yuqori darajadagi ogohlantirish e’lon qilgan. Odamlarga uydan chiqmaslik tavsiya qilinmoqda. Xitoy rahbari Si Szinpin halokatli oqibatlarni kamaytirish uchun barcha kuchlarni qutqaruv ishlariga safarbar qilishni buyurgan. Bosh vazir Li Syan esa Miyun provinsiyasida jiddiy talafotlar borligini ta’kidlagan.
Miyundagi suv omborida suv to‘lib toshgan — bu 1959-yildan beri kuzatilgan ilk holatdir. Rasmiylar daryo bo‘ylarida joylashgan aholini ehtiyotkorlikka chaqirgan, chunki yana yomg‘ir yog‘ishi kutilmoqda.
Miyun provinsiyasida suv mashinalarni oqizib ketmoqda, elektr ustunlari esa qulab tushgan. Pekin markazidan 100 km uzoqlikdagi Tayshitun shaharchasida ko‘chalar suv bilan to‘lgan, devorlar esa loy bilan qoplangan.
“Hammasi bir zumda sodir bo‘ldi. Hammayoq suv bilan to‘lib toshdi”, dedi mahalliy do‘kon egasi Juan Chjelin.
Shahar rahbariyati barcha maktablar, qurilish maydonchalari va sayyohlik faoliyatini vaqtincha to‘xtatgan. Juda shiddatli yomg‘ir 29-iyul kuni erta tongda kutilayotgani, ba’zi joylarda 30 sm gacha yog‘ingarchilik bo‘lishi aytilgan.
Eslatib o‘tamiz, 2023-yilda ham Pekinda kuchli suv toshqinlari yuz bergandi, oqibatda ko‘plab odam halok bo‘lib, 1 million kishi ko‘chirilgan. Eng katta zarar aynan Xebey provinsiyasiga to‘g‘ri kelgan. Hukumat Xebeyga 50 million yuan (taxminan 7 mln dollar) ajratib, maxsus qutqaruv guruhini jo‘natgan.
Mutaxassislar fikricha, iqlim o‘zgarishi butun dunyoda kuchli yomg‘ir, jazirama va yong‘inlar kabi halokatli ob-havo hodisalarining ko‘payishiga sabab bo‘lmoqda.
Izoh (0)