Xitoy va o‘zbek arxeologlaridan iborat guruh Surxondaryo viloyatida miloddan avvalgi VIII asrga oid manzilgohni topdi. Bu haqda Global Times manbasi xabar berdi.
Manbada aytilishicha, manzilgoh Surxondaryo daryosi bo‘yida aniqlangan. Tadqiqotchilar manzilgoh hunarmandlar turar joy majmuasi bo‘lganini taxmin qilishmoqda.
Manzilgoh kvadrat shaklidagi meʼmoriy inshoot ekanligi xabar berilgan. Unda bir nechta maydonlar mavjud bo‘lib, arxeologlar ularni o‘choqlar va chiqindi tashlanadigan chuqurliklar deb maʼlum qilishgan.
Xaroba manzilgoh ostidan bir nechta kvadrat shakldagi kichik xonalar ham topilgan. Arxeolog Xe Jierao Global Times gazetasiga maʼlum qilishicha, bu joylar qadimgi oshxonalar yoki yashash xonalari bo‘lgan. Chunki manzilgoh yaqin-atrofida ko‘p miqdorda kulolchilik buyumlari ham topilgan.
“Hududda tegirmon toshlari, zararkunandalarga qarshi kukunlar va idishlar topildi. Bu mintaqada qadimgi odamlarning oziq-ovqat mahsulotlarini qayta ishlash usullarini ochib berishi mumkin”, — degan arxeolog Xe Jierao.
Surxondaryodagi manzilgohni aniqlash loyihasi arxeolog Ma Jian va uning jamoasi tomonidan Xitoyning Shensi provinsiyasi, Sian shahridagi Shimoli-g‘arbiy universitetida boshlangan. Manzilgoh hududidagi qazish ishlariga aprel oyida kirishilgan.
Xitoylik va o‘zbekistonlik mutaxassislar O‘zbekiston hududida apreldan iyungacha jami uchta manzilgoh aniqlashgan. Ulardan biri 6 ta bino qoldiqlari va 25 ta qabrni o‘z ichiga olgan Kushon imperiyasi davriga aloqador topilmadir.
“Bunday kashfiyot aynan shu hududda qadimiy Kushonlar madaniyatining xronologik vaqt jadvalini aniqlash uchun maʼlumot taqdim etadi. Bu Surxondaryo viloyati atrofidagi sivilizatsiyaning rivojlanish trayektoriyasini ham tasavvur qilishimizga yordam beradi”, — degan loyihada qatnashgan arxeolog Van Men Global Times nashriga.
Surxondaryo daryosi bo‘yidan topilgan manzilgohda qazishma davom etayotgani xabar qilingan. Tadqiqotchilar Farg‘ona vodiysida ham manzilgohlar aniqlagani aytilgan.
Izoh (0)