Toshkent xalqaro aeroporti kassalarida endilikda 15 ta aviakompaniya chiptalarini xarid qilish mumkin. Bu haqda Uzbekistan Airports xabar berdi.
Qayd etilishicha, shu paytgacha aeroportda faqat Uzbekistan Airways va Silk Avia aviachiptalarini xarid qilish mumkin bo‘lgan. Biletlar xalqaro aeroportning ikkinchi qavatida — jo‘nab ketish zalining VIP va CIP zallari yonida joylashgan, 24/7 ishlaydigan kassadan olinadi.
Bular Uzbekistan Airways, Silk Avia, Centrum Air, Qanot Sharq, Air Samarkand, Turkish Airlines, Asiana Airlines, Lot Airlines, Belavia, Air Astana, Aeroflot, Ural Airlines, S7, Red Wings, Utair aviakompaniyalaridir, — deyiladi xabarda.
Bundan tashqari, kassada yo‘lovchilar Uzbekistan Airways, Silk Avia, Centrum Air’ning qo‘shimcha xizmatlari uchun haq to‘lashlari mumkin. Yaʼni aviachiptalarni xarid qilishdan tashqari, chiptalarni qayta bron qilish va qayta rasmiylashtirish, xizmat ko‘rsatish klassini ko‘tarish yoki tushirish, ortiqcha va maxsus bagaj, shu jumladan, o‘simlik va hayvonlarni tashish uchun to‘lovlarni amalga oshirishlari mumkin.
Shuningdek, bu yerda Fast Track va aeroportning yuqori qulaylikdagi CIP Lounge va Anor zallari xizmati uchun to‘lovni amalga oshirsa bo‘ladi.
Avvalroq Iqtisodiyot va moliya vazirligi qaroriga muvofiq, Javlonbek Umarxo‘jayev Uzbekistan Airports AJ boshqaruvi raisi etib tasdiqlangani, Toshkent aeroportida avtomobillarni ijaraga olish nuqtasi ochilgani to‘g‘risida xabar berilgandi.
Izoh (0)