Farg‘ona viloyati Buvayda tumanidagi “Mega park”da janjallashgan shaxslar maʼmuriy javobgarlikka tortildi. Bu haqda viloyat IIB axborot xizmati xabar berdi.
Qayd etilishicha, 16-iyun kuni voyaga yetmaganlar O.M., M.A. hamda A.Sh. mazkur park hududida o‘zaro gap talashib, janjallashgan. Janjalga voyaga yetmagan A.Sh.ning qarindoshi Sh.Sh. ham aralashgan.
Mazkur holat shu joyning o‘zida ichki ishlar organlari xodimlari tomonidan bartaraf etilib, yuqoridagi shaxslarga nisbatan Ma’muriy javobgarlik to‘g‘risidagi kodeksning 52- (yengil tan jarohati yetkazish), 183-moddalari (mayda bezorilik) bilan hujjatlar rasmiylashtirilgan va tegishli sudlovga yuborilgan.
Bir necha kun oldin Toshkent shahar Bektemir tumani “Chashma” mahallasida istiqomat qiluvchi bir-biriga qo‘shni bo‘lgan fuqarolar o‘zaro kelishmovchilik sababli janjallashgani to‘g‘risida xabar berilgandi. Natijada ikki nafar fuqaro yengil darajadagi jarohat olgan. Undan oldinroq esa ijtimoiy tarmoqda Olmaliqda ayollar guruh bo‘lib janjallashayotgani aytilgan videolar tarqalgan edi.
Izoh (0)