Britaniyaning Katta Manchester grafligida joylashgan Karrington qishlog‘ida yashovchi Amanda Baron (hozirda Amanda Baron-Jons) xonanda Ed Shiranga juda o‘xshash bo‘lgan Tay Jonsga turmushga chiqdi. Bu haqda “Pravila jizni” nashri yozmoqda.
Amanda britaniyalik qo‘shiqchining ashaddiy muxlisasi. Avvallari u faqat Ed Shiranga turmushga chiqaman, deya hazil qilar edi. Ikki yil avval Amanda xonandaning konsertida Edning qiyofadoshi — Tay Jons bilan tanishib qoldi. Oradan ko‘p o‘tmay juftlik farzandli bo‘lishdi: yangi tug‘ilgan chaqaloqqa haqiqiy Ed Shiran rafiqasining sharafiga Cherri ismi qo‘yildi. Oradan bir yil o‘tgach, Tay Amandaga turmush qurish taklifini berdi.
Amanda va Tay to‘y kunini “hayotlarining eng ajoyib lahzasi” deb ataydi. Marosim Ed Shiran uslubida tashkil etildi: to‘yga atalgan tort usti xonanda qo‘shig‘idan olingan satr bilan bezatildi, kelin esa qo‘shiqchining ismi yozilgan shippak bilan namoyon bo‘ldi.
Er-xotin to‘yxonaga Ed Shiranning “One Life” qo‘shig‘i ostida kirib keldi va “I Don’t Care” qo‘shig‘i yangragan chog‘da marosimni yakunlashdi.
Kelin-kuyov valsi uchun juftlik boshqa bir britaniyalik qo‘shiqchi — Jeyms Arturning qo‘shig‘ini tanladi.
“Jeyms Artur mening eng sevimli qo‘shiqchilarimdan biri. Qolaversa, biz to‘yni faqat Ed Shiran mavzusida o‘tkazishni istamadik. Odamlar buni g‘alati va noto‘g‘ri deya qabul qilgan bo‘lar edi”, — dedi Amanda.
Aytgancha, kuyov marosimdagi yagona mashhur qiyofadosh emas edi. To‘yga Buyuk Britaniya shahzodasi Garri, britaniyalik bosh-oshpaz Gordon Ramzi, futbolchi Devid Bekxem va “Karib dengizi qaroqchilari”dagi Jek Chittak obrazi qiyofadoshlari tashrif buyurdi.
Afsuski, haqiqiy xonanda Ed Shiran to‘yda qatnasha olmadi, lekin yangi oilaga virtual tarzda o‘zining tabriklarini yo‘lladi. Amanda va Tay asal oyini o‘tkazish uchun Ruminiyaga otlanmoqda.
Tay Jons bir necha yillardan beri TikTok akkauntini yuritib kelmoqda. Uning tarmoqda 180 mingdan ortiq obunachilari bor. Bloger kulgili videolar joylaydi, hayotining go‘zal va qiziqarli lahzalari bilan o‘rtoqlashadi hamda gitara chalgan videolarini yuklaydi.
“Foydalanuvchilar doim videolarimga izohda ‘Ey xudoyim, bu Ed Shiran-ku’ deb yozishadi. Men ularga javoban: ‘Men Ed emasman’ deyman”, — qo‘shimcha qildi Jons.
Izoh (0)