Xitoyda 86 yoshli Chjou Guylin o‘zining birinchi muhabbati — 81 yoshli Yan Syuguy bilan turmush qurdi. Bu haqda “Pravila jizni” yozmoqda. Xitoyda mazkur voqea ko‘plab insonlarning, jumladan, ommaviy axborot vositalarining e’tiborini tortdi.
Ular Pekin davlat universiteti huquqshunoslik fakultetida birga tahsil olgan. Talabalik davrida Chjou va Yan o‘rtasida iliq munosabatlar paydo bo‘lgan, ammo universitetni tugatgach, ikki yosh noma’lum sabablarga ko‘ra ajralishadi.
Ularning bir-biriga bo‘lgan chuqur mehriga qaramay, yoshlarning har biri o‘z oilasini qurdi va hayot yo‘lida alohida davom etdi, — deb yozdi South China Morning Post.
Guylin bakalavrni tamomlagach, o‘z tug‘ilib o‘sgan shahrida maktab tashkil etdi va uning birinchi direktoriga aylandi. Oradan 60 yil o‘tgach, Chjou va Yan turmush o‘rtoqlari vafotidan keyin yana uchrashishdi. So‘ng ular oila qurishga va umrining qolgan qismini birga yashab o‘tishga qaror qildi.
To‘ydan keltirilgan lavhalar internetda tarqala boshladi. Qayd etilishicha, bayram ixcham tarzda o‘tgan va ziyofatga faqat yaqin do‘stlar va qarindoshlar tashrif buyurgan. Kelin bayramda raqsga tushdi va qo‘shiq aytdi, kuyov esa tangu barabanida unga jo‘r bo‘ldi.
Nashrda yozilishicha, bayram ziyofati o‘tkazilgan xonadon sheʼrlar va dil izhorlari bitilgan tabriknomalar bilan to‘ldirilgan.
60 yil davomida birorta kitob qalbimizda tuygan hijronni ta’riflab bera olmas edi, — deyiladi maktublarning birida.
Internet foydalanuvchilarning aksariyati ularning quvonchiga sherik bo‘ldi va o‘z fikrlarini yozib qoldirdi:
Mana buni haqiqiy sevgi deb atash mumkin. Keksa yoshga yetganda ham u kelin uchun chiroyli bayram tashkil qildi. Hozirgi kunda turmush qurayotganlarning ko‘pchiligi suyuklisi uchun bunday sa’y-harakatlarni bajarishni bilmaydi, — deydi internet foydalanuvchilaridan biri.
Izoh (0)