Баҳрайн ва Эрон ҳукуматлари ўзаро сиёсий алоқаларини тиклаш мақсадида музокаралар бошлашга розилик билдирди. Бу ҳақда Al Arabiya нашри хабар берди.
Манбада айтилишича, ушбу борадаги келишув ҳақида якшанба куни Баҳрайн давлат ахборот агентлиги хабар берган. Манама ва Теҳрон ўртасида икки томонлама муносабатларни тиклашга келишилган.
Алоқаларни қайта ташкил этиш тадбирлари доирасида Теҳронда Баҳрайн ташқи ишлар вазири Абдуллатиф ал-Заёний ва Эрон ташқи ишлар вазири вазифасини бажарувчи Али Бағэри Кани учрашган. Икки мамлакат расмийси ўзаро тушунмовчиликларни юзага келтираётган ички ва ташқи омиллар ҳақида сўз юритган.
Ўтган ойда Баҳрайн қироли Ҳамад бин Исо ал-Халифа мамлакати Эрон билан муносабатларини яхшилашни интиқлик билан кутаётганини маълум қилган эди. Агар келишув ошса, кенг кўламли иқтисодий ва маданий лойиҳалар ишга туширилиши айтилган.
Баҳрайннинг расмий ахборот агентлиги (BNА) хабарига кўра, Москвада Россия президенти Валдимир Путин билан учрашув чоғида қирол Ҳамад Баҳрайн ва Эрон ўртасидаги дипломатик муносабатларни тиклаш борасида сўз очган. Муносабатларни нормаллаштиришни ортга суришдан маъно йўқ эканлигини айтган. Россия раҳбаридан икки томон келишувларида воситачилик қилиш сўралган.
Маълумот ўрнида, Баҳрайн Эрон билан алоқаларини 2016 йилда узган. Мамлакат Теҳронни Саудия Арабистонининг ички ишларига аралашишда айблаган.
2016 йил январида Саудия ҳукумати таниқли шиа раҳнамоси Нимр ал-Нимрни 2011 йилдаги ҳукуматга қарши норозилик ҳаракатларида қатнашишда айблаб, қатл этган эди. Ушбу ҳолатга нисбатан Эрон расмийлари кескин муносабат билдириб чиққан.
Изоҳ (0)