Nigeriya shimolida 23-iyun kuni qurolli guruhlar 100 dan ortiq fuqaroni o‘g‘irlab ketgan. Bu haqda Al Jazeera nashri xabar berdi.
Manbada aytilishicha, hodisa shimoliy Katsina shtatida ro‘y bergan. Mototsikllarda kelgan bir guruh shaxslar tinch aholiga qarata o‘t ochgan.
Maydabino qishlog‘ida hujum oqibatida 7 kishi halok bo‘lgan. 100 nafardan ortiq fuqarolar hududdan olib ketilgan.
Shtat politsiyasi matbuot kotibi Abubakar Aliyu Sodiq hujum va yetti kishining o‘limini tasdiqlagan. Bedarak yo‘qolganlar haqida esa maʼlumot taqdim qilinmagan. Rasmiylar hodisa yuzasidan tergov olib borilayotganini bildirgan.
“Ular yetti kishini o‘ldirishgan, jumladan, ikkita voyaga yetmagan bola yoqib yuborilgan. Qurolli hujum 6 soatdan ortiq davom etgan”, — politsiya matbuot kotibi Abubakar Aliyu Sodiq
So‘nggi yillarda tinch aholi vakillarini o‘g‘irlab ketish Nigeriyaning shimoli-g‘arbiy va markaziy mintaqalarida ko‘plab kuzatilgan. Ushbu hududlarda o‘nlab qurolli guruhlar katta to‘lovlar talab qilish uchun qishloq aholisi va sayohatchilarni o‘g‘irlagan.
Mahalliy aholi va rasmiylarga ko‘ra, mart oyida qurolli shaxslar shimoli-g‘arbiy Kaduna shtatidagi maktabga hujum uyushtirib, o‘nlab o‘quvchilarni o‘g‘irlab ketgan. O‘tgan yili ham qurolli shaxslar shimoli-g‘arbiy Kebbi shtatidagi maktabga bostirib kirib, 80 dan ortiq o‘quvchini olib ketgan edi.
Izoh (0)