Ўзбекистон ташқи савдоси: экспортда олтин, импортда автомобиль улуши кўп

Ўзбекистоннинг 2024 йил январь–май ойларидаги ташқи савдо айланмаси ҳажми 26,7 миллиард долларига етди. Бу 2023 йилнинг мос даврига нисбатан 769,5 миллион долларга (3 фоиз) кўп.

Статистика агентлиги таҳлилига кўра, беш ой давомида мамлакат 10,8 миллиард долларлик товар ва хизматлар экспорт қилган (2023 йил мос давридагидан 1,9 фоиз кўп). Импорт ҳажми эса 15,9 миллиард долларни (3,7 фоиз кўп) ташкил этган. Ҳисобот даврида манфий ташқи савдо баланси 5 миллиард доллар қийматида қайд этилди.

Республика ташқи савдосининг асосий улуши Хитой (18,9 фоиз), Россия (17,9 фоиз), Қозоғистон (5,9 фоиз), Туркия (4,5 фоиз) ва Корея (3,4 фоиз) мамлакатлари ҳиссасига тўғри келмоқда.

Ҳисобот даврида Ўзбекистоннинг МДҲ давлатлари билан савдо айланмаси ҳажми 8,9 миллиард долларни (2023 йил мос даврига нисбатан 0,6 фоиз ўсиш) ташкил этди. Шундан экспорт 3,1 миллиард доллар, импорт ҳажми 5,7 миллиард доллар бўлди.

Экспорт ҳажми ва унинг таркиби

Мамлакатнинг январь–май ойлари давомидаги экспортидан тушган маблағларнинг қарийб 38,6 фоизи олтин ҳиссасига тўғри келган. Мазкур даврда 4,2 миллиард долларлик олтин сотилган. Шунингдек, саноат товарлари экспорти 1,7 миллиард долларни, хизматлар экспорти 2,2 миллиард долларни ташкил этди.

Экспорт таркибида 629,2 миллион долларли озиқ-овқат маҳсулотлари ва тирик ҳайвонлар, 613 миллион долларлик кимёвий воситалар ва шунга ўхшаш маҳсулотлар бор. Яна 499,6 миллион долларлик машиналар ва транспорт асбоб-ускуналари ҳам экспорт қилинган.

Ўзбекистон беш ой ичида 228,7 миллион долларлик нефть ва нефть маҳсулотлари, 59,9 миллион долларлик газ, 55,4 миллион долларлик электр токи экспорт қилди.

Ҳисобот даврида мамлакат Афғонистон, Франция ва Россия давлатларига экспорт ҳажмини оширганини кўриш мумкин.

Импорт ҳажми ва унинг таркиби

Жорий йил январь–май ойларида Ўзбекистон 15,9 миллиард долларлик товар ва хизматлар импорт қилди (2023 йил мос давридагидан 3,7 фоиз ўсди).

Импорт таркибидаги энг катта улуш машиналар ва транспорт асбоб-ускуналари (37,3 фоиз), саноат товарлари (15,2 фоиз) ҳамда кимёвий воситалар ва шунга ўхшаш маҳсулотлар (12,3 фоиз) ҳисобига тўғри келган.

Хусусан, беш ой давомида 5,9 миллиард долларлик машиналар ва транспорт асбоб ускуналари, 2,4 миллиард долларлик саноат товарлари, 1,4 миллиард долларлик озиқ-овқат маҳсулотлари ва тирик ҳайвонлар импорт қилинган.

Ҳисобот даврида Ўзбекистон хорижий давлатлардан 975,2 миллион долларлик нефть, 643,2 миллион долларлик газ, 72,2 миллион долларлик электр токи импорт қилган.

Республика Хитой, Россия, Туркманистон, Ҳиндистон ва АҚШ мамлакатларидан товар ва хизматлар импорти ҳажмини сезиларли оширган.