Канада ҳукумати Эрондаги ислом инқилоби қўриқчилари корпусини террорчи тузилмалар рўйхатига киритган. Бу ҳақда Ғарб нашрларига таяниб, Al Jazeera хабар берди.
Манбада айтилишича, Канадада Эрон инқилобий-ҳарбий гуруҳ расман террорчи марказлар рўйхатига киритилган. Канада расмийлари Эрондаги фуқароларига мурожаат йўллаб, мамлакатни тарк этишни сўраган.
Эрон ислом инқилоби қўриқчилари корпуси Канада томонидан ҲАМАС ва “Ҳизбуллоҳ” билан яқин алоқалар ўрнатишда айбланган. Ушбу тузилма, шунингдек, уни идора қилувчи Эрон ҳукуматига “инсон ҳуқуқларига тўлиқ эътиборсизлик кўрсатиш” айблови қўйилган.
Эрондаги корпусни терроризм молиячиси сифатида айблаган Канада ҳукумати қарори 19 июнь куни жамоатчиликка эълон қилинган. Ушбу гуруҳ ва унга дахлдор ташкилотлар вакилларининг Канадага киришига чеклов қўйилган.
“Ислом инқилоби қўриқчилари корпусининг “қора рўйхат”га киритилиши Канада ҳукуматининг Эроннинг ноқонуний хатти-ҳаракатлари ва терроризмни қўллаб-қувватлаш ташаббуслари жазосиз қолмаслигини таъминлаш бўйича кенг кўламли саъй-ҳаракатларига асосланади”. — дейилган Канада расмийлари баёнотида.
Эрон расмийлари Канада ҳукумати чиқарган қарорга муносабат билдирмаган. Эрон ОАВларида ҳам бу мавзу ёритилмаган.
Маълумот ўрнида, Эрон ислом инқилоби қўриқчилари корпуси 2019 йилда Қўшма Штатлар томонидан террорчи гуруҳлар рўйхатига киритилган. Ушбу гуруҳ билан алоқа учун АҚШда узоқ муддатли қамоқ жазоси белгиланган.
Изоҳ (0)