Turkistondagi jadidchilik harakati tarixiga oid “Armon” hujjatli filmi Fransiyaning Kann shahrida bo‘lib o‘tgan World Film Festival xalqaro festivalida “Ta’limga oid eng yaxshi film” nominatsiyasida g‘olib bo‘ldi. Bu haqda film rejissyori Ruslan Soliyev ma’lum qildi.
World Film Festival — jahon mustaqil kino festivali bo‘lib, unga har oy yuzlab filmlar yuboriladi. Hakamlar hay’ati a’zolari va kino sohasi mutaxassislari oyning eng yaxshi filmlarini saralab olishadi. Festivalda bir nechta nominatsiyalar mavjud.
Dastlab “Armon” filmi “Eng yaxshi tarixiy film” nominatsiyasiga nomzod bo‘ldi. Keyinroq hakamlar hay’ati mazkur loyihani “Ta’limga oid eng yaxshi film” nominatsiyasiga ko‘chirdi.
Hujjatli film rejissyori Ruslan Soliyev o‘zining Instagram’dagi sahifasida hakamlar hay’ati qarorini quyidagicha izohladi:
“Festival ochilish marosimida tashkilotchilar tushuntirib berdi: Dastlab, film “eng yaxshi tarixiy film” nominatsiyasida ko‘rib chiqildi, ammo hakamlar hayʼati yevropalik tomoshabinlar uchun jadidlar mavzusi yiroq va notanish degan xulosaga kelishdi. Qolaversa, film tomoshabinga O‘zbekiston tarixi bilan yaqindan tanishish imkonini beradi.
Armon” filmi tufayli yevropalik tomoshabinlar Sharqda naqadar ajoyib insonlar yashab o‘tgani, millat rivoji uchun jonini fido etgani haqida bilib oldilar, jadidlarning dramatik taqdirini his qilib ko‘rdilar. Film dunyoning istalgan nuqtasidan tomosha qilgan insonlarda chuqur iz qoldiradigan, barchamiz uchun umumiy muammolarni yoritadigan hikoyadir”, — deydi rejissyor.
“Armon” filmi AQSh, Yevropa va Afrikalik kinoijodkorlar bilan raqobatlashdi.
Ruslan Soliyev mazkur filmning o‘zbek kinosi uchun katta yutuq ekanini qayd etib o‘tdi:
“Fikrimcha, bu butun O‘zbekiston kino sanoati uchun muhim g‘alaba, chunki loyiha g‘arblik tomoshabinlarga millatimiz, buyuk tariximiz haqida hikoya qilishdek noyob imkonni yaratdi”, — deya ta’kidladi rejissyor.
“Armon” filmi jadidchilikka asos solinish tarixi, uning namoyondalari taqdiri, 1917-yil siyosiy voqealarining islohotchilar harakatiga ta’siri, shuningdek jadidlarning O‘zbekiston tarixida qoldirgan izi haqida haqida hikoya qiladi. Bundan tashqari, film gender tenglik masalalariga e’tibor qaratadi va Markaziy Osiyoning boshqa davlatlaridagi taraqqiyparvarlar harakatlariga ham to‘xtaladi. Kartinada bosh rollarni O‘zbekiston va boshqa mamlakatlarning taniqli shaxslari, xususan Erkin Bozorov, Said-Abdulaziz Yusupov, Manija hamda Askar Ilyasovlar ijro etgan.
Filmni suratga olish ishlari O‘zbekiston, Rossiya va Turkiya davlatlarida bo‘lib o‘tdi. Loyiha ustida ikki yil davomida ishlandi.
Izoh (0)