Туркистондаги жадидчилик ҳаракати тарихига оид “Армон” ҳужжатли фильми Франциянинг Канн шаҳрида бўлиб ўтган World Film Festival халқаро фестивалида “Таълимга оид энг яхши фильм” номинациясида ғолиб бўлди. Бу ҳақда фильм режиссёри Руслан Солиев маълум қилди.
World Film Festival — жаҳон мустақил кино фестивали бўлиб, унга ҳар ой юзлаб фильмлар юборилади. Ҳакамлар ҳайъати аъзолари ва кино соҳаси мутахассислари ойнинг энг яхши фильмларини саралаб олишади. Фестивалда бир нечта номинациялар мавжуд.
Дастлаб “Армон” фильми “Энг яхши тарихий фильм” номинациясига номзод бўлди. Кейинроқ ҳакамлар ҳайъати мазкур лойиҳани “Таълимга оид энг яхши фильм” номинациясига кўчирди.
Ҳужжатли фильм режиссёри Руслан Солиев ўзининг Instagramъдаги саҳифасида ҳакамлар ҳайъати қарорини қуйидагича изоҳлади:
“Фестивал очилиш маросимида ташкилотчилар тушунтириб берди: Дастлаб, фильм “энг яхши тарихий фильм” номинациясида кўриб чиқилди, аммо ҳакамлар ҳайъати европалик томошабинлар учун жадидлар мавзуси йироқ ва нотаниш деган хулосага келишди. Қолаверса, фильм томошабинга Ўзбекистон тарихи билан яқиндан танишиш имконини беради.
Армон” фильми туфайли европалик томошабинлар Шарқда нақадар ажойиб инсонлар яшаб ўтгани, миллат ривожи учун жонини фидо этгани ҳақида билиб олдилар, жадидларнинг драматик тақдирини ҳис қилиб кўрдилар. Фильм дунёнинг исталган нуқтасидан томоша қилган инсонларда чуқур из қолдирадиган, барчамиз учун умумий муаммоларни ёритадиган ҳикоядир”, — дейди режиссёр.
“Армон” фильми АҚШ, Европа ва Африкалик киноижодкорлар билан рақобатлашди.
Руслан Солиев мазкур фильмнинг ўзбек киноси учун катта ютуқ эканини қайд этиб ўтди:
“Фикримча, бу бутун Ўзбекистон кино саноати учун муҳим ғалаба, чунки лойиҳа ғарблик томошабинларга миллатимиз, буюк тарихимиз ҳақида ҳикоя қилишдек ноёб имконни яратди”, — дея таъкидлади режиссёр.
“Армон” фильми жадидчиликка асос солиниш тарихи, унинг намоёндалари тақдири, 1917 йил сиёсий воқеаларининг ислоҳотчилар ҳаракатига таъсири, шунингдек жадидларнинг Ўзбекистон тарихида қолдирган изи ҳақида ҳақида ҳикоя қилади. Бундан ташқари, фильм гендер тенглик масалаларига эътибор қаратади ва Марказий Осиёнинг бошқа давлатларидаги тараққийпарварлар ҳаракатларига ҳам тўхталади. Картинада бош ролларни Ўзбекистон ва бошқа мамлакатларнинг таниқли шахслари, хусусан Эркин Бозоров, Саид-Абдулазиз Юсупов, Манижа ҳамда Аскар Ильясовлар ижро этган.
Фильмни суратга олиш ишлари Ўзбекистон, Россия ва Туркия давлатларида бўлиб ўтди. Лойиҳа устида икки йил давомида ишланди.
Изоҳ (0)