Poytaxtdagi “Yoshlar ijod saroyi”da ichki ishlar xodimlarining faoliyatiga bag‘ishlangan “Ofitser 55” filmining taqdimot marosimi bo‘lib o‘tdi. Taqdimotda loyiha ijodkorlari va taniqli aktyorlar ishtirok etdi.
Film Ichki ishlar organlarini xizmat faoliyatini keng ochib berib, og‘ir vaziyatlarda ularning ushbu vaziyatdan qanday chiqishi, xalq tinchligi va osoyishta hayoti uchun jonini berishga tayyor ekani, ularning professional tayyorgarligi haqida hikoya qiladi.
Ushbu loyiha O‘zbekiston Kinematografiya agentligi va Ichki ishlar vazirligi hamkorligida suratga olingan. Film 10 ta qismdan iborat va unga rejissor Rustam Meliyev boshchilik qilgan. Loyihada bosh rollarni Erkin Bozorov, Abror Yo‘ldoshev, Nigina Anorboyeva va Jamshid Asadov ijro etgan va film bir yildan ortiqroq vaqt davomida suratga olingan.
“Ushbu serialda men jinoyat qidiruv ishlari bo‘lim boshlig‘i, podpolkovnik O‘rinov rolini ijro etdim. Bu mening kinodagi faoliyatimdagi birinchi yirik, jiddiy rol. Bor mahoratimni ishga solib, konsultantlarni aytganini qilib, o‘qib-o‘rganib, shu soha vakillarining kasbiga oid jarayonlarni his qilib to‘laqonli rol ijro etishga harakat qildim. Qanchalik yaxshi chiqqaniga tomoshabin baho beradi”, — deydi aktyor Abror Yo‘ldoshev.
.bmp)
“Serialning suratga olish jarayonlari qish paytiga to‘g‘ri keldi. Unda tundan tonggacha bo‘lgan jarayonlar ko‘p bo‘lgani qiynadi. Dinamikani oshirishga boy bo‘lgan kadrlar aktyorlardan ozgina ko‘proq mashaqqatni talab qildi.
Bu serial o‘zbek tomoshabiniga o‘zbek kinoijodkorlari ham jahon standartlaridan qolishmaydigan loyihalarni yarata oladi, yosh jamoalar ustoz ijodkorlarning hamkorligida yaxshi asarlar yaratishga qodir, degan gapni ayta olsa kerak”, — deydi filmda bosh rollardan birini ijro etgan aktyor Erkin Bozorov.
.bmp)
“Premyerani juda uzoq kutdik. Juda ko‘p suratga olish jarayonlari, montaj ishlari, ovoz berish jarayonlari, umuman olganda juda ko‘p ish qildik. Biz qilgan har bir loyiha ijodkorlarga o‘zining farzandidek muhim. Serialda bosh rolni ijro etmagan bo‘lsam ham rolimga bor mehrimni berdim. Bahoni xalqimiz beradi. Hozir bunaqa film xalqimizga, yoshlarimizga, kattalarga kerak deb o‘ylayman”, — deydi aktrisa Feruza Yusupova.
.bmp)
Film taqdimoti davomida loyiha ijodkorlari sahnaga taklif etildi va loyiha haqida o‘z fikrlarini bildirdi. Taqdimot davomida tashrif buyurgan tomoshabinlar va loyiha ijodkorlariga “Ofitser 55” filmining qismlari namoyish etildi.
Batafsil reportajni quyida tomosha qilishingiz mumkin.
Izoh (0)