Orol dengizining qurigan tubi hududida qariyb 600 ming gektarlik maydonda sho‘r va nam tuproqlarda o‘rmonzorlar barpo etish maqsadida birinchi marta noyob o‘simlik Arundo donax tajriba maydonida sinovdan o‘tkazilmoqda.
Ekologiya, atrof-muhitni muhofaza qilish va iqlim o‘zgarishi vazirligi matbuot xizmatining xabar qilishicha, ekish ishlari O‘rmon xo‘jaligi ilmiy-tadqiqot instituti professori Zinoviy Novitskiy boshchiligida olib borilmoqda.
“Bular Orol dengizining qurigan tubi uchun boshqa hududlardan olib kelingan. 1-2-yil ichida Orolning barcha hududlarida Arundo donax o‘simliklari ekiladi, chunki ildiz so‘rg‘ichlari tez unib chiqadi. Ushbu o‘simlik tuzli shamollarning oldini oladi, uning poyasidan qurilish, to‘qimachilikda foydalaniladi, shuningdek, uni yem-xashak sifatida ham ishlatish mumkin”, — deydi Novitskiy.
Hozirda o‘simliklar bir oylik. Ular qurg‘oqchilikka chidamli bo‘lganligi bois og‘ir cho‘l sharoitida ham to‘rt metrgacha o‘sa oladi. Uning ekish texnologiyasi noyobligi shundaki, ekish jarayonida ko‘chatlar o‘rniga ildiz kurtaklari o‘tqaziladi.
Orol dengizi tubida 2024-yili jami 150-200 ming gektar o‘rmonzorlar barpo qilish rejalashtirilgan. O‘tgan 5 yil davomida Orol dengizi tubida 1 million 730 ming gektar o‘rmonzor barpo etilgan, yaʼni 17 ming km kvadrat maydon ko‘kalamzorlashtirilgan.
Izoh (0)