Orolning qurigan tubida o‘rmon ekish markazi tashkil etiladi. Bu haqda SHHT tashqi ishlar vazirlari kengashining navbatdagi yig‘ilishida ma’lum qilindi.
“SHHTga a’zo davlatlarning sun’iy o‘rmonlar barpo etish va degradatsiyaga uchragan hududlarda o‘rmon barpo etish bo‘yicha katta tajribasini inobatga olib, bugun biz Orol dengizining qurigan tubi va cho‘l hududlarini o‘rmonzorlashtirish bo‘yicha xalqaro markazni tashkil etish taklifini ilgari surdik. Bu borada Markaziy Osiyo davlatlaridan kelgan hamkasblarimiz bizni qo‘llab-quvvatladi. O‘ylaymanki, kelajakda bu g‘oyani ilgari suramiz”, — degan Qozog‘iston ekologiya va tabiiy resurslar vaziri Yerlan Nisanbayev.
Majlisda SHHT bosh kotibi Chjan Min, Hindiston, Eron, Xitoy, Qirg‘iziston, Pokiston, Rossiya, Belarus, Tojikiston va O‘zbekiston delegatsiyalari ishtirok etdi. Unda ekologik muammolarni hal etish, iqlim o‘zgarishi, issiqxona gazlari chiqindilarini kamaytirish, chiqindilarni samarali boshqarish va alohida muhofaza etiladigan tabiiy hududlar sohasida hamkorlikni rivojlantirish bo‘yicha birgalikdagi harakatlarni amalga oshirishga qaratilgan masalalar muhokama qilindi.
Yerlan Nisanbayevning ta’kidlashicha, atrof-muhit muammolarining chegarasi yo‘q, SHHTga a’zo barcha mamlakatlarda o‘xshash ekologik muammolar mavjud, ularni faqat kuchlarni birlashtirish orqali birgalikda hal qilish kerak.
Delegatsiya rahbarlari SHHTning 2024-yilni “Ekologiya yili” deb e’lon qilish bo‘yicha harakatlar rejasini yanada targ‘ib qilish muhimligi va zarurligini ta’kidladi.
SHHTga a’zo davlatlarning ekologik muammolarni hal etish bo‘yicha birgalikdagi yondashuvlari, SHHTning 2024—2026-yillarga mo‘ljallangan “Yashil makon” dasturini amalga oshirish bo‘yicha qo‘shma harakatlar rejasi, shuningdek, tashkilotga a’zo davlatlarning 2025—2027-yillarga mo‘ljallangan atrof-muhitni muhofaza qilish sohasidagi hamkorligi konsepsiyasini amalga oshirish rejasi tasdiqlandi.
O‘zbekiston Ekologiya, atrof-muhitni muhofaza qilish va iqlim o‘zgarishi vazirligi bergan ma’lumotga ko‘ra, Orol dengizi tubida 2024-yili jami 150-200 ming gektar o‘rmonzorlar barpo qilish rejalashtirilgan.
Izoh (0)