Саудия Арабистони Швейцариядаги Украина бўйича тинчлик саммитида иштирок этмайди. Бу ҳақда қиролликдаги дипломатик манбаларга таяниб, DPA нашри хабар берди.
Ҳукуматнинг ушбу қарорига 15—16 июнь кунлари бўлиб ўтадиган саммитда Россиянинг иштирок этмаслиги сабаб бўлди, — дея аниқлик киритган нашр.
Ар-Риёд ҳозирча мазкур қарорини расман эълон қилгани йўқ.
Хитой ҳам анжуманда қатнашишдан бош тортган. Аввалроқ Хитой ТИВ кун тартиби Пекин талаблари ва жаҳон ҳамжамиятининг умумий умидларидан ажралиб туришини айтиб, Хитойнинг саммитда иштирок этиши даргумон эканини таъкидлаган. АҚШ президенти Жо Байденнинг иштироки ҳам сўроқ остида.
Швейцариядаги Тинчлик конференцияси
Швейцария 15—16 июнь кунлари Луцерн яқинида Украина бўйича конференцияга мезбонлик қилади. Учрашувга 160 га яқин давлат вакиллари таклиф этилган. Россия мазкур тадбирга таклиф қилинмаган.
Россия ТИВ расмийси Мария Захарованинг таъкидлашича, Москва Владимир Зеленский формуласи бўйича кейинги учрашувда қатнашмайди ва қатнашмоқчи эмас.
Россия тадбирда иштирок этишдан бош тортмоқда, чунки конференциядан мақсад мамлакатга ультиматум қўйишдир, — дейди Россиянинг Берндаги элчиси Сергей Гармонин.
Россия президенти Владимир Путин Москва Киев билан мулоқотни давом эттиришга тайёр, бироқ Туркия ва Беларусда эришилган келишувлар асосида ҳамда жойлардаги вазиятни ҳисобга олган ҳолда унга қайтиш мумкин.
Изоҳ (0)