Chexiyaning Liberets shahrida Bolalar kunini nishonlash chog‘ida odamlar yomg‘irdan yashiringan daraxtga yashin urdi – ko‘plab kattalar va bolalar jarohat olib, kasalxonaga yotqizildi. News maʼlumotlariga ko‘ra, favqulodda holat 2-iyun, yakshanba kuni sodir bo‘lgan.
Qayd etilishicha, bayram Vratislavitsadagi qalʼa bog‘ida kunduzi soat ikkida boshlangan, u yerga yuzlab odamlar kelgan. Yomg‘ir tufayli mehmonlarning bir qismi uyga ketishdi, lekin ko‘pchilik yomon ob-havo tarqalishini kutishga qaror qildi va katta daraxt tagiga yashirindi. Aynan shu 20 metrli eman daraxtini kechki soat besh yarimlarda yashin urdi.
“Chaqmoq chaqib, momaqaldiroq bo‘ldi, keyin esa biz odamlarning qulaganini ko‘rdik. Bu dahshatli edi”, — dedi hodisa guvohlari.
Shu bilan birga, eman daraxti yashinga dosh berganini ham taʼkidlash kerak — uning ostida yashiringan odamlarning ustiga birorta ham shox tushmadi.
Yashin urishi natijasida qutqaruvchilar yigirmaga yaqin odam jarohat olganini qayd etishdi. Ulardan 17 nafari, jumladan, ikki yoshdan o‘n olti yoshgacha bo‘lgan o‘n nafar bola Liberetsdagi kasalxonaga, ikki kishi esa qo‘shni Yablonets-nad Nisu shahridagi kasalxonaga yotqizilgan. Yana bir jabrlanuvchi vertolyotda Motoldagi Praga kasalxonasiga olib ketilgan.
Jabrlanganlarning ko‘pchiligi yurak ritmining buzilishi, kuyishlar va oyoq-qo‘llarining harakatchanligining vaqtinchalik buzilishi bilan bog‘liq nevrologik jarohatlarga duchor bo‘lgan.
Izoh (0)