Жанубий Корея ҳукумати мамлакат ҳудудига чиқинди шарлари учирилиши ортидан Шимолий Корея билан имзоланган ҳарбий пактни тўхтатади. Бу ҳақда Сеулдаги президент идораси таратган хабарга асосланиб, Reuters нашри хабар берди.
Муҳокамаларга сабаб бўлган ҳужжат “Корея яриморолида ҳарбий кескинликни камайтириш тўғрисида”ги пакт экани айтилган. Ушбу ҳужжат 2018 йилда икки корейс мамлакати раҳбарлари учрашувида эришилган.
Пактга кўра, икки томон ҳам демаркация чизиғи ва унга яқин 10 километр масофада ҳарбий машқлар олиб бормаслик мажбуриятини олган. Денгиз ҳудудида ҳам ҳарбий кемаларни назорат чизиғига киритмасликка келишилган.
Сўнгги ҳафтада шимол томонидан Сеул назоратидаги ҳудудларга юзлаб чиқинди шарлари учирилиши муносабатларни совуқлаштирди. Оқибат Жанубий Корея расмийлари ҳар қандай ҳарбий келишувни қайта кўриб чиқиш ҳақида муҳокама бошлаган.
2023 йилнинг кузида Шимолий Корея расмийлари ҳарбий пактдан чиққанини эълон қилган. Шу воқеадан бошлаб Пхеньян маъмурияти чегара яқинидаги қўриқлаш постларига қўшин ва қўшимча қуроллар жойлаштиргани кузатилган.
Жанубий Корея расмийлари чегарада ўрнатилган овоз кучайтиргичларни қайта ишга туширишларини билдиришган. Бу пропаганда воситаси бўлиб, қўшни давлатдаги аҳолига жануб тўғрисида ҳукуматга муқобил тарзда маълумот узатишни кўзда тутади.
Шимолий Корея расмийлари таъкидлашича, жанубликлар мунтазам равишда шимолга озиқ-овқат, дори-дармон, пул, К-поп мусиқий альбомлари ва драмалари юкланган USB тўпламлар жўнатиб туради. Ушбу ҳаракатдан мақсад Пхеньяннинг мафкурасига зарба бериш экани айтилган. Чиқинди шарлари учириш ҳам ушбу ҳаракатга жавобан амалга оширилган.
Изоҳ (0)