Чехиянинг Либерец шаҳрида Болалар кунини нишонлаш чоғида одамлар ёмғирдан яширинган дарахтга яшин урди – кўплаб катталар ва болалар жароҳат олиб, касалхонага ётқизилди. News маълумотларига кўра, фавқулодда ҳолат 2 июнь, якшанба куни содир бўлган.
Қайд этилишича, байрам Вратиславицадаги қалъа боғида кундузи соат иккида бошланган, у ерга юзлаб одамлар келган. Ёмғир туфайли меҳмонларнинг бир қисми уйга кетишди, лекин кўпчилик ёмон об-ҳаво тарқалишини кутишга қарор қилди ва катта дарахт тагига яширинди. Айнан шу 20 метрли эман дарахтини кечки соат беш яримларда яшин урди.
“Чақмоқ чақиб, момақалдироқ бўлди, кейин эса биз одамларнинг қулаганини кўрдик. Бу даҳшатли эди”, — деди ҳодиса гувоҳлари.
Шу билан бирга, эман дарахти яшинга дош берганини ҳам таъкидлаш керак — унинг остида яширинган одамларнинг устига бирорта ҳам шох тушмади.
Яшин уриши натижасида қутқарувчилар йигирмага яқин одам жароҳат олганини қайд этишди. Улардан 17 нафари, жумладан, икки ёшдан ўн олти ёшгача бўлган ўн нафар бола Либерецдаги касалхонага, икки киши эса қўшни Яблонец-над Нису шаҳридаги касалхонага ётқизилган. Яна бир жабрланувчи вертолётда Мотолдаги Прага касалхонасига олиб кетилган.
Жабрланганларнинг кўпчилиги юрак ритмининг бузилиши, куйишлар ва оёқ-қўлларининг ҳаракатчанлигининг вақтинчалик бузилиши билан боғлиқ неврологик жароҳатларга дучор бўлган.
Изоҳ (0)