Мексикада маҳаллий штат раҳбарлигига номзод Хорхе Хуэрта Кабрера сайловларга икки кун қолганда отиб ўлдирилди. Бу ҳақда Марказий Америка нашрлари хабарига асосланиб, Reuters нашри хабар берди.
Ҳокимликка номзод Изукар де Матаморос шаҳрида отиб ўлдирилган. Воқеа 31 май куни содир бўлган. Хуэрта Кабрера 2 июнга режалаштирилган маҳаллий сайловларга тайёргарлик кўраётган бўлган.
Хорхе Хуэрта Кабрера Мексиканинг марказий Пуэбла штатида маҳаллий ҳокимият учун курашаётган номзод бўлгани хабар қилинган. Суиқасд содир этилганда у кенг аҳоли қатламлари иштирокидаги сиёсий митингда қатнашаётган бўлган.
Ҳужум пайтида Хорхе Хуэрта Кабреранинг рафиқаси ва ҳамкасбларидан бири ҳам оғир яраланган. Ўқ овозларидан саросимага тушган кўп сонли митинг иштирокчилари ҳар томонга тарқалиши оқибатида жароҳатланганлар кўп бўлган.
Маълумотларга қараганда, Хорхе Хуэрта Кабреранинг ўлдирилиши билан 2024 йилги маҳаллий штат ҳокимлигига сайловларда ҳалок бўлган номзодлар сони 37 нафарга етган. Бундан олдин, 2021 йилда ўтказилган маҳаллий сайловларда ҳам 36 номзод отиб кетилгани маълум қилинган.
Мексика ҳукумати маълум қилишича, сайловдаги номзодлар ва уларнинг яқинларига жорий йил бошидан бери бутун мамлакат бўйича жами 828 та ҳужум содир этилган. Ҳужумлар асосан номзодларни дўппослаш, уйига ўт қўйиш тарзида кечган.
Расмийлар ҳужумларда наркотик моддалар контрабандаси билан шуғулланувчи ноқонуний картелларни айблаган. Ушбу картеллар кўпинча маҳаллий полицияни назорат қилиш ёки муниципиал ҳукуматлардан пул ундириш мақсадида суиқасд уринишларини амалга ошириши хабар қилинган.
Изоҳ (0)