Shou-biznes olamiga kirib keladigan shaxslarning hisobida albatta mo‘maygina pul bo‘lishi lozim, deb hisoblanadi. Ammo bugungi qahramonlarimiz mashhur bo‘lgunga qadar qashshoqlik bilan uzoq vaqt kurashib kelgan. Endilikda ularning qasrdek uylari, barcha sharoitlari muhayyo. Quyida bir vaqtlar boshpanasiz qolib ketgan, bugun esa katta hurmat va e’tiborga sazovor bo‘lgan mashhurlarning ilhom beruvchi hikoyalari bilan tanishamiz.
Holli Berri
Aktrisalik faoliyatining dastlabki yillarida Berri turli boshpanalarda jon saqlagan. 20 yoshdan oshganida ijarada yashay boshlagan. U o‘tgan murakkab davr uchun minnatdor ekanligini va qiyinchiliklar aktrisada kuchli xarakter shakllantirganini ta’kidladi.
Reader’s Digest nashriga bergan intervyuda Berri o‘tmishni yodga olib:
Bu davr o‘zimga qanday g‘amxo‘rlik qilishni va har qanday vaziyatdan omon qolish mumkinligini o‘rgatdi, — deydi.
Jim Kerri
Jim Kerri Inside the Actors Studio telekanaliga bergan intervyusida oilasining moliyaviy qiyinchiliklari hamda bolaligida olgan tarbiyasidagi murakkabliklar haqida shunday dedi:
Biz oilamiz bilan furgonda yashardik. 15 yoshimda maktabni tashlab, oilamga yordam berish uchun farrosh bo‘lib ishlaganman.
Kelli Klarkson
American Idol nomi bilan mashhur bo‘lishdan avval Kelli Klarkson shou-biznesga endigina kirib kelgan yosh aktrisa edi. Karyera qurish uchun Los Anjelesga ko‘chib kelgan Kellining kvartirasi fojiali tarzda yonib ketdi. Shaharda biror do‘sti yoki qarindoshi bo‘lmagani uchun u mashinasida bir necha hafta yashashga majbur bo‘lgan.
Silvestr Stallone
Mashhur aktyor bo‘lish orzusida bo‘lgan Stallone uch hafta avtobus bekatida yashab, ish topish imkoniyatlarini intiqlik bilan kutgan. Uning tashqi ko‘rinishi ko‘plab rejissyorlarga yoqmas, kastinglarda muvaffaqiyatsizlikka uchrardi.
Umidsizlikka tushgan bo‘lajak aktyorga kattalar uchun filmda suratga tushish taklifi berildi. Kunlik 100 AQSH dollari haq to‘lanadigan bu ishga Stallone istamaygina rozi bo‘ldi va bir necha kundan so‘ng ishlagan puliga boshpana topdi.
Stiv Harvi
Birinchi rafiqasi bilan ajrashgandan so‘ng Harvi moliyaviy jihatdan cheklanib qolgan edi. Mashhur tok-shou boshlovchisi faqatgina ko‘rsatuv syomkalari bo‘ladigan vaqtda mehmonxonada qolishga imkoni bo‘lar, boshqa kunlari esa mashinasida uxlashga to‘g‘ri kelardi.
People nashrining ma’lumotlariga ko‘ra, teleboshlovchi shu tariqa uch yil umrini o‘tkazgan va keyinchalik moliyaviy muammolardan xalos bo‘lgan.
Jennifer Lopes
Lopes shou-biznesdagi faoliyatini raqqosalikdan boshlaydi. Begona shaharga ko‘chib kelgan yosh qizning boshpanasi bo‘lmagani uchun, raqs studiyasida uch oy davomida tunashga majbur bo‘ladi.
Ilk mashhurlikni Jennifer 1991-yilda Fly Girl raqs truppasidagi faoliyati orqali qo‘lga kiritdi. Guruh In Living Color nomli teleshouda chiqish qilgach Lopes va boshqa raqqosalar sekin-asta xalqqa tanila boshladi.
Stiv Jobs
Mashhur Apple kompaniyasining marhum bosh direktori bir vaqtlar do‘stlari yotoqxonasining polida uxlagan, gazlangan suv idishlarini yig‘ib sotgan, har yakshanba kuni cherkovdan bepul oziq-ovqat olish uchun uzoq yo‘l yurgan.
Bu davr Stiv uchun og‘ir kechadi, qiyinchiliklar unda qat’iyat va chidamlilikni shakllantirdi. Jobsning texnologiya imperiyasi uni milliarderga aylantirdi.
Daniel Kreyg
Jeyms Bond sifatida mashhur bo‘lishdan avval aktyor bir vaqtlar o‘smirlik yillarini Londondagi park skameykalarida uxlab o‘tkazgan. Ilgari kino sanoatiga kirib kelishda muammolarga duch kelgan aktyor, hozirda turli takliflarni rad etib kelmoqda.
Izoh (0)