Lotin amerikalik Jennifer Lopes bugungi kunda muvaffaqiyatli aktrisa, xonanda, raqqosa, model va o‘z go‘zalligini saqlab qolgan betakror ona. U 1969-yilda Nyu Yorkda tug‘ilgan va o‘z faoliyatini musiqiy videolar va teleko‘rsatuvlarda raqqosa sifatida boshlagan.
Jey Lo sog‘lom turmush tarzining uchta qoidasi bor: sport, uyqu va to‘g‘ri ovqatlanish. U bolaligidan sport bilan faol shug‘ullanib kelmoqda. Gimnastika va softbolni yaxshi ko‘radigan yulduz o‘zining go‘zallik va salomatlik sirlari bilan bo‘lishdi.
Doimiy jismonan faol bo‘lish va nafas olish mashqlari
Jennifer Lopes har kuni tongda yugurish, yoga va 20 daqiqalik meditatsiyani bajarishga harakat qiladi. U tez-tez kardio mashg‘ulotlar bajaradi, raqs tushadi va badantarbiya qiladi. Ruhan dam olish, tashvishlarni biroz unutish va salbiy fikrlardan xalos bo‘lishda nafas olish mashqlari unga yordam beradi. Shuningdek, sog‘lom uyqu salomatlik uchun muhimdir.
Foydali va tabiiy mahsulotlar iste’mol qilish
Aktrisa qaddi-qomatini saqlab qolish uchun taomnomasiga jiddiy e’tibor beradi. Uning tongi mevali va proteinli kokteyl bilan boshlanadi, tushlikda esa tabiiy oqsilga boy oziq-ovqatlarni afzal ko‘radi. Xonanda tushlikni 18:30 dan keyingi vaqtga qoldirmaydi.
Terini parvarish va himoya qilish
Har kuni tozalash, namlash va quyoshdan himoyalovchi vositalardan foydalanish Jenniferning kundalik yuzni parvarish qilishiga asoslangan uchta asosiy qoidadir. U uydan tashqariga chiqishni rejalashtirmagan bo‘lsa ham, kundalik odatlarini tark etmaydi.
Terini namlash va mimik ajinlarni tekislash uchun aktrisa zaytun yog‘idan iborat maxsus kosmetikalardan foydalanadi. Kremlarni yuzdan tashqari bo‘yin, yelka va hatto qulog‘iga ham surtishni unutmaydi. Sochlar parvarishi uchun Jey Lo kokos moyidan foydalanadi.
Butkul o‘zgartirib yuboradigan emas, balki go‘zallikka urg‘u beradigan makiyaj
Jennifer Lopes jigarrang va kulrang tenlardan foydalanishni yaxshi ko‘radi. Qanday makiyaj qilishdan qat’i nazar xonanda tabiiylikni yo‘qotmaslikka va eng go‘zal tomonlariga urg‘u berishga harakat qiladi.
Uning fikricha, agar siz qalban baxtsiz bo‘lsangiz, ko‘zlaringizdagi qayg‘uni hech qanday bo‘yoq yashira olmaydi. Insonlar ko‘z orqali yuragingizni his qiladi. Shuning sabab kosmetikadan haqiqiy “men”ingizni yashirish uchun emas, balki afzal tomonlaringizni ko‘rsatish uchun foydalanish kerak.
Ruhan kuchli bo‘lish
Jennifer Lopes o‘zining irodali va qat’iyatli xarakteri bilan ham boshqa mashhurlardan ajralib turadi. U chindan ham istasangiz va imkon qadar ko‘proq harakat qilsangiz, barcha narsaning iloji borligiga qattiq ishonadi. Jennifer og‘ir kunlarda ham ruhiyatini cho‘ktirmaslikka va hayotida nima bo‘lishidan qat’i nazar, maqsadlar sari qadam tashlashda davom etadi.
Bolaligida Jey Lo raqqosa bo‘lishni istaganida atrofdagilar uning ustidan kular, hech qachon ishonch bildirmas edi. Ammo bunday salbiy fikrlar yulduzning yanada ko‘proq mehnat qilishiga undagan:
Men baxtni tashqaridan topaman, baxtni menga boshqa bir odam berishi kerak, deb o‘ylar edim. Keyinroq ulg‘aygach, bu tushuncha xato ekanligini angladim. Agar o‘zingizni qadrlasangiz, hayotdagi rolingizni tushunsangiz, siz eng baxtli inson bo‘lasiz, — deydi Lopes.
Izoh (0)