Maxsus vaksina, xorijdagi operatsiyalar ham foyda bermagan: rossiyalik aktrisa Anastasiya Zavorotnyuk qanday kasallikka chalingan edi?

“Mening go‘zal enagam” serialida mashhurlikka erishgan aktrisa Anastasiya Zavorotnyuk besh yil davomida saraton bilan kurashdi. Unga glioblastoma — bosh miyaning eng agressiv o‘simtasi tashxisi qo‘yilgan edi. Aktrisa o‘zining dahshatli kasalligi haqida uchinchi bor ona bo‘lganidan bir necha oy o‘tib bilib qoldi. Bugungi kunga qadar uning kasallik yillarida olingan birorta fotosurati mavjud emas.

Bo‘yindagi chandiq va video orqali tashxis

2019-yil 23-avgust kuni Anastasiya Zavorotnyuk saraton kasalligiga chalingani haqida shov-shuvli xabarlar tarqaldi. Avvaliga foydalanuvchilar Instagram’dagi videoga asoslanib shunday xulosaga keldi. Yerevanda zargarlik salonini ochish marosimi ko‘rsatilgan videotasvirda aktrisa bo‘ynini berkitishga harakat qildi. Bu esa saratonga biopsiya tahlili olinganiga ishora qilardi.

Bir necha kun ichida Anastasiyaning glioblastoma bilan kasallangani haqida ma’lumotlar paydo bo‘ldi. 2019-yilning 5-aprelida Zavorotnyuk so‘nggi marta — salon ochilish marosimida ko‘rinish bergan edi. Shundan so‘ng aktrisaning na kasalxonada, na uyda tushgan biror surati mavjud emas. Go‘yo Nastya birdan g‘oyib bo‘lib qolgandek edi.

Oila a’zolari doim sukut saqladi, yordamchilar rad etishdi

Anastasiya Zavorotnyukka qo‘yilgan miya saratoni tashxisi uning rasmiy vakillari tomonidan uzoq vaqt davomida rad etib kelindi. Aktrisaning menejerlari mazkur xabarlarga javoban:

“Bularning bari mish-mish, xolos. Soxta xabarlarga e’tibor bermasligingizni so‘raymiz. Nastya hozirda farzandlari bilan Italiyada ta’tilni o‘tkazmoqda. U o‘zini yaxshi his qilyapti. Sentyabr oyida ular qaytib keladi”, — dedi Zavorotnyukning yordamchisi Marina Potapova.

Aktrisaning oila a’zolari va qarindoshlari esa hech qanday izoh bermadi. Bu vaqtda Zavorotnyukning ijtimoiy sahifasida arxiv fotosuratlar qo‘yilar edi. Bu esa muxlislarni yanada ko‘proq tashvishga soldi.

Zavorotnyukning oilasi davolanish uchun moddiy yordamdan bosh tortdi. “Nastyaning oilasi muhtoj emasligi, ularga hech qanday yordam kerak emasligini aytishdi”, — dedi Anastasiya bilan suratga tushgan hamkasblari. Bu orada kasallik borasidagi mish-mishlar yangi dahshatli tafsilotlar bilan ko‘payib bordi.

Miyadagi shish va koma

2019-yil 13-sentyabr kuni Anastasiya Zavorotnyukning zudlik bilan kasalxonaga yotqizilgani haqida xabarlar paydo bo‘ldi. Saraton kasalligining so‘nggi bosqichi tufayli miyasida shish paydo bo‘lgan aktrisa reanimatsiyaga tushib qolgan edi.

Anastasiyada o‘pka shishi va pnevmoniya boshlangani uchun uni sun’iy nafas olish apparatiga ulashdi. Aktrisa endilikda o‘zi harakatlana olmas, kuchli dori-darmonlar ongiga salbiy ta’sir ko‘rsatgan edi. Krekshino qishlog‘idagi qo‘shnilarining so‘zlariga ko‘ra, Nastyaning onasi Valentina Borisovna doim ko‘zida yosh bilan yurar edi.

O‘tkazib yuborilgan saraton

Saraton aniqlanishidan avval Anastasiya Zavorotnyukda glioblastomaning asosiy belgilari — kuchli bosh og‘rig‘i, hushdan ketish, qayd qilish kabilar kuzatilgan. Aktrisa buning boisini kuchli stress va kuniga 12 soat ishlagani deb taxmin qilgan. Saraton tasdiqlangach, unga kimyoterapiya qilindi, ammo muolajalar besamar edi. So‘ng davolanish ishlari xorijda davom etdi. Biroq malakali mutaxassislar ham unga yordam bera olmadi. Aktrisa Moskvaga qaytib kelishga majbur bo‘ldi. Ma’lum vaqtdan so‘ng shifokorlar uning qadam tashlashida buzilish borligini sezishdi. Bu esa o‘simtaning yanada kuchayganini anglatar edi.

Bosh miya suyagi trepanatsiyasi

2019-yilning bahorida Germaniyada aktrisada bosh miya trepanatsiya operatsiyasi o‘tkazildi. Bu orqali nemis shifokorlari o‘simtaning bir qismini olib tashlashdi va unga qarshi dori vositasi ishlab chiqish uchun laboratoriyaga namuna yuborishdi.

Nastyaning ahvoli biroz yaxshilandi

2019-yil 18-sentyabr kuni Anastasiya Zavorotnyuk o‘zini yaxshi his qilayotgani haqida ma’lumot paydo bo‘ldi. Endilikda u mustaqil nafas olayotgan edi. Shundan so‘ng paparatssilar kasalxonaga kirishga urindi. Bunday voqea qayta takrorlanmasligi uchun uning xonasida kecha-yu kunduz qo‘riqlash xizmati ishlay boshladi.

Ikkinchi operatsiya

2019-yil 21-sentyabrda Anastasiya Zavorotnyukning do‘sti Sergey Mayorov aktrisaning ahvoli haqida aytib berdi: “Kecha men Nastyaning direktori Marina Potapova bilan bog‘landim. Ikkinchi operatsiya muvaffaqiyatli o‘tdi. Shifokorlar gistologiya natijalarini ko‘rib chiqdilar. Hali hammasi yaxshi bo‘lishiga umid bor”, — dedi Mayorov Markaziy televideniye dasturi studiyasida.

2019-yil 8-oktyabrda Anastasiya Zavorotnyuk o‘ta og‘ir ahvoldagi bemorlar uchun ixtisoslashtirilgan markazga yuborildi. Ertasi kuni, 9-oktyabrda esa Zavorotnyuk tanasining o‘ng qismi falaj bo‘lib qolgani haqida xabarlar paydo bo‘ldi.

Oilaning rasmiy bayonoti

2019-yil 15-oktyabrda Anastasiya Zavorotnyukning oila a’zolari ilk bor uning kasalligi haqida ma’lumot berdi. “Anastasiya haqiqatan ham hozirda davolanmoqda. Biz sizdan faqatgina samimiy duo qilishingizni va bemorni hurmat qilgan holda kasallik tafsilotlarini oshkor etmasligingizni so‘raymiz. Bu — bizning oilaviy va shaxsiy ishimizdir”, — deb yozdi aktrisaning yaqinlari.

Saratonga davo

2020-yil 5-avgust kuni Anastasiya Zavorotnyuk sankt-peterburglik olimlar tomonidan o‘zi uchun yaratilgan maxsus vaksina bilan davolanayotgani ma’lum bo‘ldi. Bu immunitet hujayralariga asoslangan eksperimental vaksina bo‘lib, u immun tizimini saraton hujayralariga qarshi hujum qilish uchun o‘rgatadi. Vaksina har bir bemor uchun alohida tayyorlanadi. Davolash kursi ikki yilgacha davom etishi mumkin.

Anastasiya Zavorotnyukning o‘limi

Aktrisaning o‘limi haqidagi xabar 2024-yil 30-may kuni uning “Vkontakte” sahifasida paydo bo‘ldi:

“Bugun tunda, uzoq va og‘ir xastalikdan so‘ng bizning Nastya vafot etdi”, — deb yozilgan edi xabarda.