Jahon sog‘liqni saqlash tashkiloti joriy yil boshida ayanchli statistikani e’lon qildi. So‘nggi yillarda butun dunyo bo‘ylab yigirma milliondan ortiq kishida saraton kasalligi qayd etildi. O‘lim ko‘rsatkichi esa 9,7 millionni tashkil etdi.
Saraton kasalligini o‘rganish xalqaro agentligi (IARC — International agency for research on cancer) 2030-yilga borib kasallanganlar soni 22,2 millionni tashkil etishini taxmin qilmoqda. Kasallikni yengishga bo‘lgan harakatlar doim ham muvaffaqiyatli kechmaydi. Ammo uni erta aniqlash to‘liq davolanishning muhim omilidir.
Bugungi qahramonlarimizga esa saraton kasalligidan xalos bo‘lish nasib etdi.
Yuliya Volkova
“t.A.T.u” guruhining sobiq a’zosi, xonanda Yuliya Volkovaning ikkinchi farzandi tug‘ilgach, 2012-yilda unga qalqonsimon bez saratoni tashxisi qo‘yildi. Aktrisaning so‘zlariga ko‘ra, tushida u saratondan darak beruvchi voqealarni ko‘rgan.
“Men qon tahlilini o‘tkazdim, natija yaxshi edi. Ultratovush tekshiruvi qalqonsimon bezda tugunni aniqladi. Biopsiya saraton kasalligiga chalinganimni ko‘rsatdi... Operatsiya bo‘ldim, ammo u muvaffaqiyatsiz o‘tdi. Ovoz nervi kesilgach, ovozimni butkul yo‘qotdim”, — dedi xonanda.
To‘rt yildan so‘ng kasallik qaytalandi. Yuliya farzandlari onasiz katta bo‘lishidan qo‘rqar edi. Xayriyat, bu safar kasallikni yengdi va saraton ortda qoldi.
Robert De Niro
Gollivud aktyori, “Cho‘qintirgan ota”, “Stajyor”, “Bir kuni Amerikada” va boshqa ko‘plab filmlar yulduzi Robert De Niroga 2003-yilda prostata bezi saratoni tashxisi qo‘yildi. Aktyor muntazam ravishda yillik tekshiruvdan o‘tib turar edi. Shunday tekshiruvlarning birida shifokorlar Robertda kasallikni aniqladi.
“Oskar” va BAFTA mukofotlari sovrindori davolanish uchun “Berkin va meni izla” filmidagi suratga tushish ishlarini kechiktirishga majbur bo‘ldi. Uning otasiga ham bir vaqtlar shunday tashxis qo‘yilgan, ammo ota davolanishdan voz kechgan.
Anjelina Joli
Gollivud aktrisasi saratonga chalinish ehtimolini aniqlash uchun BRCA-1 gen mutatsiyasiga test topshirdi. Chunki gen ayollarda ko‘krak va tuxumdon saratoni ehtimolini oshirishi mumkin. Natija musbat chiqqach, Joli sut bezlari va tuxumdonlarni olib tashlash uchun operatsiyadan o‘tishga qaror qildi:
“BRCA-1 testi ijobiy natija ko‘rsatishi avtomatik ravishda operatsiya qilish kerakligini anglatmaydi. Men bir nechta shifokorlar, jarrohlar va naturopatlar bilan suhbatlashdim. Har qanday sog‘liqqa oid muammoni hal qilishning bir necha yo‘li mavjud, albatta. Eng muhimi, to‘g‘ri yo‘lni bilish va tanlashdir”.
Anjelinaning onasi saratondan 56 yoshida, uning xolasi esa 61 yoshida vafot etgan.
Kayli Minoug
2005-yilda avstraliyalik xonanda Kaylida ko‘krak bezi saratoni aniqlandi. Davolanish va salomatlikni tiklash uchun qo‘shiqchi faoliyatini to‘xtatishga qaror qildi. Turli mamlakatlar bo‘ylab gastrol safarlarini, yangi musiqa yozishni va jurnalistlar bilan muloqot qilishni to‘xtatdi.
36 yoshida onkologiyaning 1-bosqichi tasdiqlangach, Minoug chuqur depressiyaga tushib qoldi: u hech kim bilan muloqot qilmadi, faoliyatini to‘liq tugatish haqida ko‘p o‘yladi. Yulduzning sochlari to‘kilib, vazni 38 kilogrammga yetgan edi. Xonandani yaqin insonlari qo‘llab-quvvatladi va u saraton ustidan g‘alaba qozondi.
Bo‘lib o‘tgan voqealardan keyin Minoug ayollarni mammolog ko‘rigidan har yili o‘tib turishga da’vat eta boshladi va mamlakatda shifokorlarga tashriflar yuz barobar ko‘paydi.
Xyu Jekman
Rosomaxa obrazi bilan tanilgan Xyu Jekmanda birinchi marta saraton bezi 2013-yilning noyabr oyida aniqlangan. 2014-yil may oyida esa kasallik qaytalangan. Avvalroq Jekman matbuotga bergan intervyusida rakning bu turi kasallik boshlang‘ich davrida aniqlansa, oson davolanishi, faqatgina muntazam shifokor ko‘rigida bo‘lish hamda quyoshdan saqlovchi vositalardan foydalanish kifoya ekanligini ta’kidlagan.
Aktyor bazal hujayrali karsinoma — o‘ta xavfli teri saratoni bilan ancha yillardan beri kurashib kelmoqda. Joriy yilning boshida esa Jekman bayonot berdi: saraton yana qaytalandi. Endilikda Jekmanni yana bir kurs davolanish ishlari kutmoqda.
Izoh (0)