Portugaliya, Litva va Daniya O‘zbekistonga yangi elchilar tayinladi. Bu haqda O‘zbekiston Tashqi ishlar vazirligi matbuot xizmati xabar berdi.
Maʼlum qilinishicha, tashqi ishlar vaziri Baxtiyor Saidov Portugaliyaning O‘zbekistonga yangi tayinlangan elchisi Madalena Fisherdan ishonch yorliqlarini qabul qilib oldi.
“Biz ikki tomonlama aloqalarimizni mustahkamlash zarurligini, bugungi holat mavjud salohiyatga mos kelmasligini taʼkidladik. Ikki davlat tashqi ishlar vazirliklari bu saʼy-harakatlarning tashabbuskori bo‘ladi. Elchi xonimga mamlakatimizdagi diplomatik faoliyati davomida davlatlarimiz o‘rtasidagi munosabatlarning ulkan salohiyatini ro‘yobga chiqarish va undan samarali foydalanishda muvaffaqiyatlar tilaymiz”, – deyiladi xabarda.
Shuningdek, Baxtiyor Saidov Litvaning O‘zbekistondagi yangi elchisi Egidiyus Navikasdan ham ishonch yorliqlarini qabul qildi. Uchrashuvda ikki va ko‘p tomonlama shakllardagi hamkorligimizning asosiy ustuvor yo‘nalishlar muhokama qilingan.
Bundan tashqari, Baxtiyor Saidov ishonch yorliqlarini topshirish uchun O‘zbekistonga kelgan Daniyaning O‘zbekistondagi elchisi Yakob Xenningsenni qabul qildi.
Izoh (0)