“AQSHda migrantlar oqimi yaxshi bo‘lmasa, aholi kamayib ketadi” — Kongress

AQSHda 2040-yilga kelib o‘lim darajasi tug‘ilishdan oshib ketadi va migrantlar oqimi yaxshi bo‘lmasa, mamlakat aholisi kamayib ketadi. AQSH Kongressining Byudjet idorasi o‘zining tegishli hisobotini e’lon qildi.

Qonun chiqaruvchi organ tarkibidagi ushbu idora Kongressni iqtisodiy ma’lumotlar, hisob-kitoblar va prognozlar bilan ta’minlaydi.

“Prognozlarga ko‘ra, 2040-yildan boshlab o‘lim ko‘rsatkichi tug‘ilishdan oshadi. Natijada immigratsiya yo‘qligi sababli aholi soni kamayishni boshlaydi”, — deyiladi hisobotda.

Hujjat mualliflari fikricha, 2054-yilda AQSHning umumiy davlat qarzi yalpi ichki mahsulotning 172 foizini tashkil etadi, yaqin o‘n yil ichida federal qarzi esa 116 foizni tashkil qiladi. Shu bilan birga, o‘tgan yili boshqarma 2053-yilga kelib, davlat qarzi hajmi YIMning 181 foizini tashkil etishini prognoz qilgandi.

Ekspertlar prezident Jo Bayden maʼmuriyati tomonidan Amerika iqtisodiyotini barqarorlashtirish bo‘yicha ko‘rilayotgan qadamlar munosabati bilan kutilgan ko‘rsatkichni kamaytirishga qaror qilgan.