Markaziy Osiyo davlatlaridan 2023-yilda 50 mingdan ortiq odam AQSH chegarasini noqonuniy kesib o‘tgan. Bu haqda senator Stiv Deynsga tayanib, Daily Mail xabar berdi.
Deynsga ko‘ra, noqonuniy muhojirlar “AQSHda sodir bo‘ladigan terror xuruji uchun uxlab yotgan hujayralarning bir qismi” bo‘lishi mumkin. Hozirda kamida Markaziy Osiyo davlatlarining 40 ming fuqarosi AQSHning boshpana berish bo‘yicha sud jarayonini kutmoqda. Ulardan
- 17 ming nafari O‘zbekiston,
- 7 ming nafari Qirg‘iziston,
- 3 ming nafari Tojikiston,
- 2,7 ming nafari Qozog‘iston,
- 2 ming nafari Turkmaniston fuqarolaridir.
Rasmiy ma’lumotlarga ko‘ra, 2021-yilda prezident Jo Bayden lavozimga kelganidan beri 7,3 milliondan ortiq muhojir AQSH chegarasini noqonuniy kesib o‘tgan.
AQSH bojxona va chegara himoyasi oktyabrdan buyon San-Diego orqali AQSHga 2500 dan ortiq o‘zbekistonlik noqonuniy kirganini ma’lum qildi. Ular qo‘lga olingandan so‘ng, qo‘shimcha federal tekshiruvdan o‘tishi kutilmoqda.
AQSHga Meksika orqali kelgan O‘zbekiston fuqarolari Bayden ustidan sudga murojaat qilgan. Ular hozirda AQSHning turli immigratsiya markazlarida (qamoqxonalarda) saqlanmoqda. O‘zbekistonliklar o‘z da’volarida millatiga ko‘ra diskriminatsiya qilinganlari sababli ularni qamoqqa olish tartibini noqonuniy deb e’tirof etish, shuningdek, advokatlar uchun xarajatlarini qoplashni so‘ramoqda.
Izoh (0)