Ukraina prezidenti Vladimir Zelenskiy Rossiya tomonidan o‘ziga nisbatan uyushtirilgan suiqasd rejasining oldi olingach, Davlat qo‘riqlash boshqarmasi (DQB) rahbari Sergey Rudni ishdan bo‘shatdi. Bu haqda tegishli manbalarga tayanib, Deutsche Welle xabar berdi.
Ishdan bo‘shatish sababi aytilmagan. 2019-yil noyabr oyidan beri 47 yoshli Rud amaldorlarni himoya qiluvchi va bevosita prezidentga bo‘ysunuvchi agentlik – DQB rahbari lavozimida ishlab kelayotgandi. Bungacha Rud shaxsiy xavfsizlik va shu bo‘limning shaxsiy tarkibi bilan ishlash bo‘limlarida turli lavozimlarda faoliyat yuritgan.
7-may kuni Ukraina Xavfsizlik xizmati (UXX) Ukraina prezidentiga suiqasd uyushtirishga tayyorgarlik ko‘rayotgan Rossiya Federal xavfsizlik xizmati (FXX) beshinchi xizmati agentlari tarmog‘i fosh etilganini e’lon qilgan.
Kontrrazvedka va UXX tergovchilari FXXning Ukraina prezidenti va mamlakat oliy harbiy-siyosiy rahbariyatining boshqa vakillarini yo‘q qilish rejalarini barbod qildi, — deyiladi Ukraina razvedka xizmati bayonotida.
Faoliyati Moskva tomonidan nazorat qilingan guruhga ikki UXX polkovnigi kiritilgan. Har ikki gumonlanuvchi qo‘lga olingan.
UXX maʼlumotlariga ko‘ra, FXX agentlari tarmog‘ining vazifalaridan biri prezident xavfsizligiga yaqin bo‘lgan harbiylar orasidan Zelenskiyni garovga olib, keyinchalik uni o‘ldirishi mumkin bo‘lgan ijrochilarni izlash bo‘lgan. Bundan tashqari, departamentning taʼkidlashicha, FXX UXX raisi Vasiliy Malyuk, Mudofaa vazirligi razvedka bosh boshqarmasi boshlig‘i Kirill Budanov va boshqa yuqori martabali amaldorlarni o‘ldirishni rejalashtirgan.
Davlat xavfsizlik boshqarmasi hibsga olingan polkovniklar ismini oshkor etmagan.
Izoh (0)