Украина президенти Владимир Зеленский Россия томонидан ўзига нисбатан уюштирилган суиқасд режасининг олди олингач, Давлат қўриқлаш бошқармаси (ДҚБ) раҳбари Сергей Рудни ишдан бўшатди. Бу ҳақда тегишли манбаларга таяниб, Deutsche Welle хабар берди.
Ишдан бўшатиш сабаби айтилмаган. 2019 йил ноябрь ойидан бери 47 ёшли Руд амалдорларни ҳимоя қилувчи ва бевосита президентга бўйсунувчи агентлик – ДҚБ раҳбари лавозимида ишлаб келаётганди. Бунгача Руд шахсий хавфсизлик ва шу бўлимнинг шахсий таркиби билан ишлаш бўлимларида турли лавозимларда фаолият юритган.
7 май куни Украина Хавфсизлик хизмати (УХХ) Украина президентига суиқасд уюштиришга тайёргарлик кўраётган Россия Федерал хавфсизлик хизмати (ФХХ) бешинчи хизмати агентлари тармоғи фош этилганини эълон қилган.
Контрразведка ва УХХ терговчилари ФХХнинг Украина президенти ва мамлакат олий ҳарбий-сиёсий раҳбариятининг бошқа вакилларини йўқ қилиш режаларини барбод қилди, — дейилади Украина разведка хизмати баёнотида.
Фаолияти Москва томонидан назорат қилинган гуруҳга икки УХХ полковниги киритилган. Ҳар икки гумонланувчи қўлга олинган.
УХХ маълумотларига кўра, ФХХ агентлари тармоғининг вазифаларидан бири президент хавфсизлигига яқин бўлган ҳарбийлар орасидан Зеленскийни гаровга олиб, кейинчалик уни ўлдириши мумкин бўлган ижрочиларни излаш бўлган. Бундан ташқари, департаментнинг таъкидлашича, ФХХ УХХ раиси Василий Малюк, Мудофаа вазирлиги разведка бош бошқармаси бошлиғи Кирилл Буданов ва бошқа юқори мартабали амалдорларни ўлдиришни режалаштирган.
Давлат хавфсизлик бошқармаси ҳибсга олинган полковниклар исмини ошкор этмаган.
Изоҳ (0)