Ukrainaning Buyuk Britaniyadagi elchisi Vadim Pristayko iste’foga chiqarildi. Tegishli farmon Ukraina prezidenti saytida e’lon qilindi, deb yozmoqda Meduza.
Pristayko avvalroq Vladimir Zelenskiyning Buyuk Britaniya mudofaa vaziri Ben Uollesga minnatdorlik bildirish haqidagi so‘zlarini tanqid qilgandi, deb eslatdi Ukraina ommaviy axborot vositalari.
11—12-iyul kunlari Vilnyusda bo‘lib o‘tgan NATO sammiti chog‘ida Uolles Ukraina G‘arbdan olayotgan yordami uchun faolroq minnatdorlik bildirishi kerakligini aytgan. Uolles 2022-yilda Kiyevga kelish uchun 11 soat vaqt sarflagani, yetib kelishi bilan qo‘liga zarur qurollar ro‘yxati tutqazilganini aytib berdi.
“Men ularga ‘Biz Amazon emasmiz’ deb aytim”, — esladi vazir.
Ukraina prezidenti Vladimir Zelenskiy sammit chog‘ida o‘tkazilgan matbuot anjumanida Ukraina yordam uchun, jumladan, Buyuk Britaniyadan ham “doim minnatdor” ekanini aytdi.
“Bundan ortiq yana qanday minnatdor bo‘lishimiz kerakligini bilmayman. Balki har kuni ertalab turganda vazirga rahmat aytishimiz kerakdir. U menga qanday minnatdorlik bildirish kerakligini yozsin, men shunday qilaman” — dedi Ukraina rahbari.
Ertasi kuni Ukraina elchisi Pristayko Sky News telekanalida gapirar ekan, Zelenskiyning so‘zlarini “noto‘g‘ri sarkazm” deb atadi. Diplomatning qo‘shimcha qilishicha, Ukraina G‘arbdagi hamkorlari bilan qandaydir tushunmovchiliklar bo‘lishi mumkinligini Rossiyaga ko‘rsatmasligi kerak.
Keyinchalik Ben Uolles Ukraina minnatdorlik bildirmayotgani haqida bahslarga sabab bo‘lgan gaplari, aslida, noto‘g‘ri talqin qilinganini aytdi.
Izoh (0)