Buxoro viloyati IIB harakatlanayotgan Lacetti oynasidan tanasini chiqargan ayol videosi yuzasidan ma’lumot berdi.
Ijtimoiy tarmoqlarda transport vositasining old o‘rindig‘ida borayotgan yo‘lovchi transport vositasidan tana qismini chiqargani aks etgan video tarqaldi. Video Buxoro viloyati IIB Yo‘l harakati xavfsizligi boshqarmasi xodimlari tomonidan o‘rganilgan.
6-may kuni Kogon tumani “To‘dako‘l” oromgohiga borgan edim. Qaytishda yo‘lovchi olib qaytdim. Yo‘lovchining oynadan tanasini chiqarganini ko‘rmay qoldim, — deydi haydovchi.
Uning so‘zlariga ko‘ra, ayol tanasini chiqarganiga ko‘zi tushgan zahoti mashinani to‘xtatib, unga xavfsizlik kamarini taqtirgan.
Ayolning aytishicha, u shu kuni spirtli ichimlik ta’sirida bo‘lgan.
Holat yuzasidan Lacetti rusumli avtomobil haydovchisiga va transport vositasida borayotgan yo‘lovchiga nisbatan belgilangan tartibda maʼmuriy bayonnomalar rasmiylashtirilgan.
Bundan oldin Qoraqalpog‘istondagi to‘yda tanasini mashinadan chiqarib tasvirga olgan operatorlar va haydovchi jarimaga tortilgan edi. Shuningdek, Andijonda 20 yoshli qiz mashinadan tanasini chiqarib harakatlangani, Samarqandda harakatlanayotgan Gentra’dan tanasini chiqarib, soxta dollar sochgan yigitlarga chora ko‘rilgani to‘g‘risida xabar berilgandi.
Izoh (0)