“Koreya xalqaro hamkorlik agentligi (KOICA) granti asosida milliy texnik malakani baholash va malaka oshirish markazi faoliyatini tashkil etish chora-tadbirlari to‘g‘risida”gi Vazirlar Mahkamasi qarori qabul qilindi.
2022–2026-yillarga mo‘ljallangan Yangi O‘zbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturida ishsiz va ish qidirayotgan shaxslarning 160 ming nafarini talabgor kasblarga o‘qitish hamda ularning kamida 5 ming nafari kasbiy malaka darajasini tasdiqlash va ularga malaka pasportlarini taqdim etish nazarda tutilgan.
Hujjat bilan quyidagilar nazarda tutilgan:
- Koreya xalqaro hamkorlik agentligi (KOICA) granti hisobidan Kambag‘allikni qisqartirish va bandlik vazirligi muassisligida davlat taʼlim muassasasi shaklidagi Milliy texnik malakani baholash va malaka oshirish markazini tashkil etish;
- “Ishga marhamat” monomarkazlari huzuridagi o‘quv-maslahat ofislarini transformatsiya qilish.
Markazning asosiy vazifalari:
- o‘qituvchi, ishlab chiqarish taʼlimi ustalari, muhandis-ustalar, pedagog kadrlar hamda taʼlim faoliyatiga bevosita aloqador boshqa rahbar-xodimlarni qayta tayyorlash va ularning malakasini oshirish;
- O‘zbekistonning milliy malaka tizimini xalqaro standartlar va ilg‘or xorijiy tajriba asosida takomillashtirish hamda samaradorligini oshirish bo‘yicha takliflar ishlab chiqish;
- professional standartlarni ishlab chiqishda ularni xorijiy tashkilotlar hamda ilmiy hamjamiyatlar bilan samarali hamkorlikni yo‘lga qo‘yish orqali takomillashtirib borish yuzasidan takliflar ishlab chiqish;
- mehnat bozorida talab yuqori bo‘lgan ishchi kasblar bo‘yicha mutaxassislar tayyorlashga doir o‘quv-uslubiy qo‘llanmalar va ilmiy adabiyotlar yaratish.
2024-yil 1-iyundan boshlab:
- “Ishga marhamat” monomarkazlari va kasb-hunarga o‘qitish markazlarining o‘qituvchilari hamda muhandis ustalarini maqomi bo‘yicha professional taʼlim muassasalari pedagoglariga tenglashtirish hamda ularga ushbu xodimlar uchun qonunchilikda belgilangan imtiyozlar va ijtimoiy himoya kafolatlari tatbiq etiladi;
- xorijiy mutaxassislarga bajarilgan ishlar uchun to‘lanadigan to‘lov miqdori ularning malakasi, tajribasi va ularga yuklanadigan ish hajmidan kelib chiqqan holda, Kambag‘allikni qisqartirish va bandlik vazirligi tomonidan belgilanadi.
Hujjat Qonun hujjatlari maʼlumotlari milliy bazasida eʼlon qilingan va 2024-yil 7-maydan kuchga kirdi.
Bir necha kun oldin Oliy Majlis Senati raisi Tanzila Norboyeva Koreya tajribasi asosida KOICA xalqaro hamkorlik agentligi ko‘magi bilan O‘zbekistonda “Elektron parlament” tizimini joriy qilish grant loyihasining amalga oshirilishini muhokama qilgani to‘g‘risida xabar berilgandi.
Izoh (0)