“Bir o‘zim qolganman, kampirim yo‘q, uy berishsa, uylanib, birga yasharmidim” — prezident uy sovg‘a qilayotgan 101 yoshli otaxon

Prezident Shavkat Mirziyoyev kecha, 8-may kuni Mudofaa vazirligining Markaziy harbiy klinik gospitaliga borib, Ikkinchi jahon urushi qatnashchilari holidan xabar olgani, sirdaryolik otaxon bilan suhbatlashib, uning iltimosiga binoan otaxonga uy sovg‘a qilmoqchiligi ma’lum bo‘lgandi. 

“Daryo” boyovutlik 101 yoshli otaxon O‘skan ota Hojimanov bilan suhbatlashib, uning davlat rahbari bilan uchrashuvidan keyingi taassurotlari bilan qiziqdi.

Uyim yo‘q, dedim. Gulistondan bitta uy bersangiz, dedim. Bir o‘zim qolganman. Kampirim yo‘q. Gulistondan bir uy olib berishsa, kampir topib, birga yashaymanmi? Bolalarning qo‘lida yashagach, juda noqulay bo‘lar ekan. Bir-biri bilan tortishgan kuni bor, bir xil bo‘lmas ekan. Shularni ko‘rib, siqilar ekansan. Shuning uchun prezidentimizga Gulistondan menga bitta uy bering, men kelib olay, dedim. O‘zimning aravamni o‘zim tortayin, — deydi 101 yoshga kirgan O‘skan ota. 

Sirdaryo viloyati hokimligi axborot xizmati rahbari Zafar Mirrahimovning “Daryo”ga ma’lumot berishicha, viloyat hokimi Akmaljon Mahmudaliyev prezident topshirig‘idan so‘ng, otaxonga 2 xonali uy sovg‘a qilgan.

Bugun, 9-may kuni Mudofaa vazirligining Markaziy harbiy klinik gospitaliga kelgan Sirdaryo viloyati hokimi otaxon va uning yaqinlariga yangi xonadon kalitlarini topshirgan.

Qo‘shimcha qilinishicha, O‘skan ota ayni kunda Ikkinchi jahon urushining Sirdaryo viloyatida yashayotgan yagona ishtirokchisi hisoblanadi. 

Men yashovchi “savxoz”da 80 nafar urush qatnashchisi bor edi. Shulardan hozir faqat men qoldim. Hammasi o‘tib ketdi, — deydi otaxon. 

Suhbatdosh prezident Shavkat Mirziyoyevning Ikkinchi jahon urushi qatnashchilariga qaratayotgan e’tiboridan mamnunligini aytmoqda. 

E’tibor berganmisiz, Shavkat Mirziyoyev prezident bo‘lganida sochlari qop-qora edi. Hozir xalqning tashvishi sabab sochlari oqarib ketibdi. Xalqqa yo‘l ko‘rsatish, uning tashvishi bilan yashash qiyin ekan-da. Odatda ikki bolani to‘g‘ri yo‘lga solish qiyin ish. Shavkat Mirziyoyev O‘zbekistonni boshqarib turibdi, — deydi Ikkinchi jahon urushi qatnashchisi.