“Uddaburon bolalar” — josuslik haqidagi bir qator komedik filmlarni o‘z ichiga olgan franshiza. Jami 4 ta film va bitta animatsion serial chiqarilgan. 2001-yilda “Uddaburon bolalar” filmining birinchi qismi ekranlarga chiqqanidan keyin undagi superqahramonlar katta mashhurlikka erishdi va mazkur filmga asoslangan kitoblar, komikslar va videoo‘yinlar yaratildi. Quyida 21 yil o‘tib josus bolalar obrazini gavdalantirgan aktyorlarning bugungi kundagi faoliyati bilan tanishamiz.
Deril Sabara — Juni Kortes
Aktyor Deril Sabara karyerasida Juni Kortes obrazi eng asosiy rol bo‘lib qoldi. U “Eng yaxshi ota”, “Yashil jahannam”, “Jon Karter” va “Machete” kabi filmlarda suratga tushgan. Aktyor bir nechta filmlarda dublyajda ishtirok etgan. Xususan, u “Nemoni izlab” multfilmida ham ozov bergan. Deril xonanda Megan Treynor bilan 2016-yilda turmush qurgandan so‘ng boshqa filmlarda rol o‘ynamagan.
Aleksa Vega — Karmen Kortes
Ko‘pchilik Aleksani “Uddaburon bolalar” franshizasidagi rolidan eslaydi, garchi uning karyerasi bundan oldinroq boshlangan bo‘lsa ham. Uning birinchi ishlari orasida “Smerch”, “Robot hayoti” va “Okean tubida” kabi filmlar bor. Hozirda Aleksa nafaqat aktrisa, balki qo‘shiqchi hamdir. U sobiq Big Time Rush aktyori va qo‘shiqchi Karlos Penavega bilan turmush qurgan. Oila qurgach, Derildan farqli ravishda Aleksa kinolarda yanada faol ishtirok eta boshlagan. Hozirda u uch nafar farzandi tarbiyasi bilan mashg‘ul.
Rikardo Montalban — Valentin Avellan
“Uddaburon bolalar: o‘yin tugadi” filmida eng esda qolarli obrazni gavdalantirgan aktyor Rikardo Montalban edi. U Valentin Avellan bobo rolini o‘ynagan va filmda virtual o‘yin tufayli qisqa muddatga oyoqqa turib, nogiron bo‘lishiga sababchi bo‘lgan sobiq do‘stini izlab topgan.
Aktyor 70—80-yillarda kino karyerasida faol ijod qilgan. U “Fantaziyalar oroli”, “Jang maydoni”, “Sirli ko‘cha”, “Neptun qizlari” kabi filmlarda suratga tushgan. Rikardo Montalban 2009-yil 14-yanvarda 88 yoshida vafot etgan.
Silvestr Stallone — Kiberdaho
Millionlab tomoshabinlar qalbidan joy olgan, asosan jangari filmlari orqali tanilgan Gollivud aktyori Silvestr Stallone uchun “Uddaburon bolalar” filmi umuman o‘zgacha yo‘nalishda o‘zini namoyon etishiga sabab bo‘lgan. U “Rokki”, “Rembo” kabi filmlarda rol ijro etgan. Bugungi kunda Silvestr filmlarda rol o‘ynashni va mashhur tadbirlarda ishtirok etishni davom ettirmoqda.
Kortni Jayns — Demetra
Karyerasini epizodik rollardan boshlagan Kortni Jayns “Uddaburon bolalar: o‘yin tugadi” filmidan 3 yil o‘tgach aktyorlik faoliyatiga nuqta qo‘ydi. 2012-yilda o‘zining prodyuserlik agentligiga asos soldi. So‘ng 2014-yilda bir muddatga san’atga qaytib, “Sedi, uxla” nomli qisqa metrajli filmda suratga tushdi.
Rayan Pinkston — Arnold
Rayan Pinkston karyerasini 2003-yilda boshlagan. “Uddaburon bolalar: o‘yin tugadi” filmidan tashqari u “Delirium”, “Sirli portal”, “Sartaroshxona” filmlarida ishtirok etgan. Hozirda Rayan aktyorlik karyerasini davom ettirib kelmoqda.
Bobbi Edner — Frensis
Bobbi Edner “Uddaburon bolalar” dan keyin filmlardagi faoliyati keskin pasayib ketgan yana bir aktyorlardan biri. U avval bir qancha film va teleseriallarda rol o‘ynagan, “Yosh artist” mukofotiga nomzod bo‘lgan. Shundan so‘ng u faqat reklama roliklarida paydo bo‘ldi va ikki marta dublyajda qatnashdi. 2013-yilda Bobbi Edner o‘z sohasini butunlay o‘zgartirib, fitnes-trener kasbini tanladi.
Antonio Banderas — Grigorio Kortes
Ispaniyalik aktyor Antonio Banderas “Filadelfiya, “Vampir bilan intervyu”, Robert Rodriges rejissyorligidagi “Taptortmas” va “Zorro niqobi” filmlarida suratga tushgan. “Og‘riq va sharaf” dramasi uchun “Oskar” mukofotini olgan. So‘nggi yillarda Banderas “Indiana Jons” va “Perudagi Paddington”da rol ijro etdi.
Karla Gudjino — Ingrid Kortes
Karla Gudjino 1989-yilda kino sanoatiga kirib keldi. “Uddaburon bolalar” franshizasida esa katta yutuqlarga erishdi. Vaziyatdan unumli foydalangan aktrisa hamkasblaridan farqli o‘laroq, keyingi bir necha yil ichida “Muzeyda bir tun”, “Gunohlar shahri”, “Qo‘riqchilar” va “Gangster” filmlarida rol o‘ynadi.
Emili Osment — Gerta Giggls
Aktrisa Emili Osment “Uddaburon bolalar” franshizasining ikki qismida suratga tushdi. Shundan so‘ng unga “Hanna Montana” serialida bosh qahramonning dugonasi roli taklif etildi. 2000-yillar boshida Emili Osment Disney’ning eng boy yulduzlari ro‘yxatiga kiritilgan.
Izoh (0)