Turkiya qurolli kuchlari Iroq shimolidagi maxsus operatsiya davomida Kurdiston ishchi partiyasiga aloqador 5 nafar terrorchini yo‘q qildi. Bu haqda Anadolu nashri xabar berdi.
Turkiya Milliy mudofaa vazirligi voqea 30-aprel sodir bo‘lganini maʼlum qilgan. Terrorchilarga qarshi maxsus operatsiya Iroq shimolidagi Hakurk mintaqasida amalga oshirilgan.
“Terrorchilar havo hujumi natijasida zararsizlantirildi. Kurdiston ishchi partiyasiga qarshi amaliyotlarimiz qatʼiy davom etmoqda. Oxirgi terrorist yo‘q qilingunga qadar amaliyotlarimiz davom etadi”, — deyiladi Turkiya Milliy mudofaa vazirligi tarqatgan bayonotda.
Xalqaro miqyosda terrorchi tashkilot deb eʼlon qilingan Kurdiston ishchi partiyasi aʼzolari Iroq shimolida, Turkiya chegarasiga yaqin hududlarda boshpana saqlab kelayotgani maʼlum qilingan. Rasmiy Anqara chegara xavfsizligini mustahkamlash uchun ularga qarshi operatsiya o‘tkazayotganini maʼlum qilgan.
Kurdiston ishchi partiyasi qariyb 40 yillik terror kampaniyasi davomida 40 000 dan ortiq odam, jumladan, ayollar, bolalar va go‘daklar o‘limiga sababchi bo‘lgan. U asosan Turkiya hududida teraktlar uyushtirgan. Turkiya, AQSH va Yevropa Ittifoqi tomonidan partiya rasman terrorchi tashkilot deb tan olingan.
Izoh (0)