Туркия қуролли кучлари Ироқ шимолидаги махсус операция давомида Курдистон ишчи партиясига алоқадор 5 нафар террорчини йўқ қилди. Бу ҳақда Anadolu нашри хабар берди.
Туркия Миллий мудофаа вазирлиги воқеа 30 апрель содир бўлганини маълум қилган. Террорчиларга қарши махсус операция Ироқ шимолидаги Ҳакурк минтақасида амалга оширилган.
“Террорчилар ҳаво ҳужуми натижасида зарарсизлантирилди. Курдистон ишчи партиясига қарши амалиётларимиз қатъий давом этмоқда. Охирги террорист йўқ қилингунга қадар амалиётларимиз давом этади”, — дейилади Туркия Миллий мудофаа вазирлиги тарқатган баёнотда.
Халқаро миқёсда террорчи ташкилот деб эълон қилинган Курдистон ишчи партияси аъзолари Ироқ шимолида, Туркия чегарасига яқин ҳудудларда бошпана сақлаб келаётгани маълум қилинган. Расмий Анқара чегара хавфсизлигини мустаҳкамлаш учун уларга қарши операция ўтказаётганини маълум қилган.
Курдистон ишчи партияси қарийб 40 йиллик террор кампанияси давомида 40 000 дан ортиқ одам, жумладан, аёллар, болалар ва гўдаклар ўлимига сабабчи бўлган. У асосан Туркия ҳудудида терактлар уюштирган. Туркия, АҚШ ва Европа Иттифоқи томонидан партия расман террорчи ташкилот деб тан олинган.
Изоҳ (0)